CEBU, Philippines — Ni-report sa kapulisan sa Mambaling Police Station 11 Cebu City Police Office ang usa ka street vendor nga gabitbit sa iyahang dunggan nga natangtang kay giingong gipaak sa iyang ig-agaw nga street vendor sab diha sa Sitio Puntod Alaska, Barangay Mambaling, siyudad sa Sugbo niadtong Lunes sa hapon, Marso 10, 2025.
Ang biktima mao si Boy Pagasan, 32, samtang ang suspek nga mipang-os sa iyang dunggan mao si Jomaani Jamare Caballi, 31, nga usa ka Badjao ug napuyo sa maong lugar.
Gikan ang biktima sa Cebu City Medical Center dihang ni report sa kapulisan ug nagpakitabang diin bitbit niya ang natangtang nga dunggan hinungdan nga gidakop ang suspek.
Ang suspect sa iyang bahin miangkon kini sa iyang nabuhat. Matud pa niya, nagsugod kini sa away tali sa iyang mga anak ug sa mga pag-umangkon nga anak sa biktima.
Sigon sa suspek nga sigehan og bully ang iyahang anak nga batang lalake sa anak sa biktima mao nga nawad-an na kini og gana nga moeskuyla ug mosayo nalang kini pirme og uli nga maghilak. Giingong katulo kahigayon nga gi-bully ang anak sa suspect.
Giadto niya ang inahan sa bata ug gisultihan nga badlungon ang ilang anak nga dili na mang bully matod pa. Apan matod pa nasuko ang asawa sa biktima ug nakalalis silang duha.
Milaban matud pa ang biktima sa iyahang asawa hinungdan nga naglinabanay silang tanan. Nagkasinumbagay silang duha apan nalupig siya kay dako ang biktima.
Dihang naluya na siya ug ningitngit na iyang panan-aw gipaak niya ang tuo nga dunggan sa biktima ug hapit kini malangkat tanan.
Apan gamahay ang suspect sa nahimong krimen ug nangayo og pasaylo sa biktima sanglit naa siya'y lima ka mga gagmay pa nga mga anak.
Andam motabang matod pa ang suspect sa bayrunon sa pagpatambal. (BANAT NEWS)