CEBU, Philippines — Patay ang usa ka senior citizen kinsa biktima sa hit-and-run niadtong Martes sa gabii diha sa Sitio Guiwanon, Barangay Poblacion, Lungsod sa Compostela.
Ang biktima mao si Reyner Belexa Velasco, 61-anyos, kanhi seaman ug residente sa nahisgutang lugar. Ang kapolisan sa lungsod padayon sa ilang pagpahigayon sa imbestigasyon pag-ila sa drayber sa color orange nga Calibre Navarra pickup truck nga naka hit-and-run sa biktima. Base sa taho sa kapolisan nga ang biktima sakay sa iyang motorsiklo nagbiyahe padulong sa Siyudad sa Sugbo dihang kalit lang kining gibanggaan sa nahisgutang sakyanan ug gumikan sa kakusog sa impact ang biktima ug motorsiklo niini nibanda ngadto sa laing sakyanan nga nagparada.
Ang biktima kinsa nakaangkon og grabeng kadaot sa lawas daling gidala sa duol nga tambalanan apan gideklara kining patay na kini nga naabot sa tambalanan. (BANAT NEWS)
