CEBU, Philippines — Nakadawat na og sabsidiya ang mga dancing contingents sa Sinulog Grand Parade 2025 gikan sa Kagamhanan sa Dakbayan sa Sugbo diin pormal kini nga gitunol ni Mayor Raymond Alvin Garcia niadtong Enero 8, 2025.
Ang subsidy mokantidad kini ngadto sa P38 milyones diin giapod kini ngadto sa 18 ka mga contingents gikan sa Dakbayan sa Sugbo nga tagsa nga makadawat og P500,000. Samtang ang 21 ka mga out-of-town contingents makadawat og tag P1.5 milyones.
Lakip sa nakadawat og P1.5 milyones ang Dakbayan sa Mandaue ug Dakbayan sa Lapu-Lapu.
Alang kang Garcia mas importante nga sayo nga mahatag ang sabdisiya sa dili pa ipahigayon ang Grand Parade aron adunay magamit ang mga contingent kun aduna kini kinahanglan alang sa ilang pagpangandam.
Moabot ngadto sa 42 ka mga contingents ang kumpirmado nga mopasundayag atol sa grand parade karong Enero 19.
Samtang sa laing bahin nihangyo ang kapolisan sa Dakbayan sa Talisay nga unta dili lang kuhaan ang ilang pwersa aron ipadala sa siyudad sa Sugbo aron motabang sa pwersa sa Cebu City Police Office (CCPO) atol sa Sinulog grand parade.
Si Police Lt. Col. Epream Paguyod, hepe sa Talisay City Police nibutyag nga sa ilang command conference siya nipadayag sa kaandam nga mopahuwam sa ilang sakop. Apan kung mahimo sab nga dili lang kuhaan mas labing maayo.
Iyang gipasabot ang ilang kadagkuan nga ang Talisay silingan ra sa siyudad sa Sugbo ug kun adunay mga panghitabo andam ra sila sa pagtabang.
Matud pa ni Paguyod nga aduna pay mga kalihukan ang dakbayan sa Charter Day nga saulogon sa Enero 12 ning tuiga. Gabriel C. Bonjoc, MEL BANAT NEWS