CEBU, Philippines — Anaa nalang sa 247 ka paresan ang nidayon sa libreng kasal nga gipahigayon diha sa Sta. Teresa de Avila Parish Church sa Barangay Poblacion, Dakbayan sa Talisay kagahapon sa hapon.
Base sa talaan sa kagamhanan sa siyudad 248 ka paresan ang kaslon apan last minute nga nagpahibawo nga niatras ang usa ka paresan tungod kay giingong nag-away kini. Nipaso sa simbahan ang 247 ka paresan nga nipahimulos sa libreng kasal nga gidalit sa kagamhanan sa Siyudad sa Talisay.
Apan bisan pa sa pag-atras sa usa ka paresan kay nag-away mao gihapon kini ang pinakadaghan nga niapil sa mass wedding sa tinuig nga programa ni Mayor Gerald Anthony “Samsam” Gullas, Jr.diin tipik kini sa mga kalihokan sa charter day sa siyudad karong Enero 12, 2025.
Matud ni Gullas nga mao kini ang pinakadaghan nga nipahimulos sa libreng kasal. Nagkanayon si Gullas nga libre ang pagkuha sa mga dokumento pagpakasal sa simbahan hangtud sa reception.
Ang basketball gym sa Barangay Lagtang maoy gihimo nila nga reception diin dili mailhan nga kini usa ka basketball gym tungod sa desinyo ug decoration nga gihimo nila alang sa mga kaslonon.
Nagtuo si Gullas nga ang panag-uban sa magtiayon nga adunay bendisyon sa simbahan maghatag og maayong pagpuyo ilabi na nga ilang ibutang sa sentro sa ilang pamilya ang Ginoo. BDB BANAT NEWS