2 ka kawani sa city hall nga niapil sa rally wa na moreport

CEBU, Philippines — Duha sa walo ka mga empleyado sa Cebu City Hall ang wala na makita nga nag report sa buhatan ug wa pa makahatag og tubag sa giingong pag-apil nila sa protest rally nga gipasiugdahan sa kampo ni dismissed Mayor Michael Rama.

Kahinumdoman nga ang mga supporters ni Rama nihimo og protesta atubangan sa Cebu City Hall niadtong Nobiyembre 8, 2024. Dungan niini, gipahigayon ang press conference sa iyang kampo, nga gipangulohan ni kanhi Cebu City Administrator, Laywer Collin Rosell, sulod sa conference room sa mayor.

Sa samang adlaw, mitumaw ang tensiyon, nga misangpot sa pagkadakop kang Rosell.

Apan, ang Human Resource Development Office (HRDO), pinangulohan ni Henry P. Tomolacad, niila sa labing menos 24 ka mga empleyado sa City Hall nga misalmot sa kinatibuk-ang kalihokan—walo niini aktibo pa nga mga empleyado.

Tungod sa posibleng mga kalapasan, si Tomolabcad niingon nga ni issue sila og notice to explain sa walo ka mga empleyado duha ka semana ang milabay, nga naghatag kanila og 72 ka oras sa pagtubag. Apan, sukad kagahapon (Domingo), si Tomolabcad miingon nga duha ang nagpabilin nga wala pa gyud makit-i.

“Wala ma-receive personally kay wala ma-locate, so amo nalang gi-bilin sa admin officers kung asa sila na-assign, ug naa mi gipa-registered mail,” matod ni Tomolabcad.

Ang unom ka mga empleyado nga nitubag na gi-refer na sa Cebu City Legal Office (CLO) alang sa evaluation aron masuta kon gikinahanglan ba nga pasakaan sila og kasong kriminal ug administratiba.

Matud ni Tomolabcad, kining walo ka mga empleyado adunay lain-laing lebel sa pag-apil atol sa kalihokan. Dunay nisalmot sa rally duol sa Senior Citizens Park atubangan sa legislative building.

Usa, ang nalambigit sa panaglalis sa dihang si Rosell nisuway pagsulod sa buhatan sa City Administrator.

Makita sa video footage nga wala na makasulod si Rosell sa opisina human madiskubrehi nga naka-lock kini hinungdan nga nagkalalis ang iyang mga staff ug mga sulod sa opisina.

Ang uban, sumala ni Tomolabcad, nakit-an nga niapil sa press conference sulod sa conference room sa mayor, samtang ang uban nagsilbi nga siguridad alang kang Rosell sa dihang mipirma siya sa memorandum nga gitumong ngadto sa Civil Security Unit (CSU).

Gikataho nga usa ka memorandum nga gipirmahan ni Rosell, nga gitumong ngadto sa CSU, maoy usa sa mga basehanan sa pagdakop kaniya sa usurpation of authority.

Matud ni Tomolabcad, kadaghanan sa mga empleyado kanhi miyembro sa executive department apan gi-renew ubos sa buhatan sa Bise Mayor sa legislative department.

Gipasabot ni Tomolabcad nga ang mga empleyado gipatawag tungod sa lain-laing mga rason, lakip na ang pag-abandon sa mga puwesto, loitering, ug grave misconduct, nga tanan nakalapas sa ethical guidelines para sa mga empleyado sa gobyerno.

Apan giklaro niya nga wala nila matino kon election-related ba ang motibo sa ilang mga aksyon o nakalapas ba kini sa mandato sa non-partisanship, sanglit wala pa magsugod ang election campaign period.

Gidugang usab niya nga ang mga saksi gihangyo nga isumite ang ilang mga affidavit sa CLO. Pipila sa mga nisumite na sa ilang mga katin-awan nangatarungan nga wala sila makahibalo nga adunay nahitabo nga kalihokan sa palibot sa City Hall.

Iyang gipasabot nga samtang sagad nila wala mi deny sa ilang presensya sa maong kalihukan, daghan usab ang mihimakak nga duna gyuy katuyoan nga moapil.

Dugang pa niya nga ang ilang kapakyas sa pagtubag mahimong basehan sa insubordination. (BANAT NEWS)