LGBTQ legal na nga maka-adopt og bata

CEBU, Philippines — Giklaro sa Regional Alternative Child Care Office (RACCO) Central Visayas nga legal nang maka-adopt ang mga indibidwal nga sakop sa LGBTQ apan dili pwede alang sa mga same-sex couple tungod kay dili pa usab legal dinhi sa Pilipinas ang same-sex marriage.

Matud sa social welfare officer II sa RACCO-7 nga si Cyrene Anna Torres nga dako ang ilang respeto sa sakop sa LGBTQ ug mamahimo usab kini nga maka-apply isip adoptive parents ubos sa Akta Republika 11642 kun “Domestic Administrative Adoption and Alternative Child Care Act of 2022”.

“In the Philippines, under our law, dili paman gud accepted ang marriage (between same-sex couples), but they can adopt individually. Given with the same requirements for regular persons who want to adopt, LGBTQ persons can adopt but as single petitioners”, padayag ni Torres sa teleradyo program sa Office of the Cebu City Local Registrar’s I-Rehistro Mo pinaagi sa Sugboanon Channel. Base sa report sa Cebu City Public Information Office mamahimong maka-adopt ang usa ka LGBTQ nga mga indibidwal kon nagpangedaron na kini ngadto sa 25 pataas kinsa adunay hingpit nga civil capacity ug legal rights ug 16 ka tuig ang ligas sa pangedaron niini sa sagopon.

Mamahimo usab nga maka-adopt ang mga opisyal ug empleyado sa gobiyerno sa Pilipinas nga nadestino sa gawas sa nasud diin sila ang legal nga magbantay ug moalima sa bata.

Si May Sunshine Sastre, pangulod sa RACCO-7 Placement Section nagkanayon nga ang pagsagop karong panahuna mas barato ug mas dali na lang tungod sa RA 11642.

Alang sa buot nga mosagop og bata mahimong moduol sa city ug municipal social welfare ug sa development offices sa ilang local government units aron masugdan ang proseso sa pagsagop tungod kay kinahanglan pa usab kini nga mopaubos sa pre-adoption forum ug pipila ka mga training nga mamahimo na karon nga ipahigayon online. (BANAT NEWS)