Lalake gidunggab patay sa gikalalis

CEBU, Philippines — Patay ang usa ka lalake human kini giingong gidunggab sa iyang mga kalalis sa usa ka compound sa may Barangay Subangdako Mandaue City, alas dos sa kadlawon adlaw nga Huwebes.

Ang biktima mao si Argie Pua, hingkod ang pangidaron ug usa ka lead man. Samtang ang mga suspetsado mao sila si Langi Andel, 37anyos, ulitawo, stay in worker ug John Andel, 36anyos, puros lumad nga taga Marbatuan Jose Abad Santos Davao Occidental.

Mga alas dos bente sa kadlawon ang kapolisan nitubag gilayon sa giingong pagpanunggab nga nahitabo sa maong dapit apan sa ilang pag-abot sa lugar nakita nalang ang biktima nga nagligdas ug nabulit sa iyang kaugalingon nga dugo nga wala nay kinabuhi.

Base sa imbestigasyon ang mga suspetsado ug biktima giingong naglalis sa wala pa matino nga hinungdan samtang niagi sa dalan duol sa compound nga maoy nakit-an sa mga estambay.

Human sa pipila ka gutlo ang duha ka suspetsado niduol sa security guard sa compound ug nipahibalo nga ilang gidunggab ang biktima ug gituohan kini nga nakutloan sa iyang kinabuhi. Dali nga nakapanawag og police ang gwardiya ug pag-abot sa police gi-turn over ang mga suspetsado nga nikuyog ra usab sa kapolisan.

Matud pa ni Police Lt. Col. Mercy Villaro ang tigpamaba sa Mandaue City Police Office ang biktima hubog adtong panahona diin nahitabo ang krimen.

Ang managsuon giingong nipatol lang sa pagkamaoy sa biktima human giingong nagdala-dala kini og kutsilyo.

Gibutyag ni Villaro, base sa pangangkon sa managsuon nga ang biktima magmaoy kun mahubog ug magsige og pangita og samok.

Ang kutsilyo nga gigamit sa mga suspetsado kay iya sa biktima ug ilaha lang kini nga nailog, dugang pa ni Villaro.

Ang mga suspetsado nagtingkagol na karon sa karsel ug gipaabot ang pagpasang-at ug tukma nga kaso.   MEL BANAT NEWS