CEBU, Philippines — Ang Pag-IBIG Fund nipahibalo nga naaprobahan ang P91 milyones nga loan alang sa pagpalambo sa housing development sa Tagbilaran City, Bohol ubos sa gobiyerno sa Pambansang Pabahay para sa Pilipino Housing (4PH) Program.
Ang maong kantidad naglangkub sa 80 ka balay nga matag usa gi-assign ngadto sa beneficiaries nga miyembro sa Pag-IBIG.
Samtang ang ubang mga proyekto sa Dakbayan sa Toledo, Lungsod sa Tuburan ug South Road Properties (SRP) sa Dakbayan sa Sugbo bag-o pa lang nakapirma sa memorandum of understanding (MOU).
Matud ni Rio Teves, Pag-IBIG Fund Vice President alang sa Member Services Operation sa Visayas ug Mindanao nga ang dakong hagit sa pag-implementar sa 4PH program mao ang pag-identify sa mga angayan nga beneficiaries ug pagsiguro sa mga kasaligan nga kauban sa proyekto. Usa sa mga problema nga iyang gipadayag mao ang kakuwang sa luna nga mahimo nilang tukoran ug ang taas nga kantidad sa pagpalit sa mga dagko nga lote aron matubag ang kadaghan sa gipanginahanglan nga balay.
Ang proseso sa pag-convert sa mga agricultural nga luna ngadto sa residential nga lugar mahimong hinungdan sa dugang nga pagkalangan sa pag-uswag sa 4PH projects.
Sa pagkakaron, ang Cebu City, Toledo City ug Lungsod sa Tuburan padayon nga nangita ug nagtapok sa mga kwalipikadong beneficiaries alang sa SRP housing project.
Human matukod ang mga balay ug andam na nga puy-an, andam ang Pag-IBIG Fund sa pagtabang sa mga mogamit pinaagi sa financing options.
Ang 4PH program giandam aron makatabang sa mga minimum wage earners, informal settlers, mga nagpuyo sa mga peligro nga lugar, ug uban pang marginalized community members nga nangandoy ug barato nga mga balay.
Ang inisyatibo sa 4PH program naghatag prayoridad sa mga beneficiary nga gi-refer sa Local Government Units (LGUs), Department of Migrant Workers (DMW) ug uban pang mga institusyon nga giila.
Ang mga kwalipikadong aplikante kinahanglan nga aktibong miyembro sa Pag-IBIG nga adunay labing menos 24 ka buwan nga kontribusyon ug dili molapas sa edad nga 70 sa panahon sa maturity sa loan.
Aron maka-applay kinahanglan nga i-contace sa mga miyembro ang ilang LGU aron mahibaw-an ang mga proyekto sa 4PH nga anaa sa ilang lugar.
Human mapili ang usa ka balay kinahanglan nga ang mga aplikante makasunod sa mga pre-qualification requirements nga gi-set sa LGU.
Ang LGU mo sumiter sa listahan sa mga kwalipikadong aplikante ngadto sa Pag-IBIG Fund, aron masugdan ang assessment ug approval process sa ilang housing loan. (BANAT NEWS)