CEBU, Philippines — Giluwas sa kabomberohan ang 18 ka nursing students sa Cebu Technological University-Main Campus nga nahimutang sa M.J. Cuenco Avenue corner R. Palma Street, Barangay Tinago, Siyudad sa Sugbo human sila na trapped sa elevator sa maong tunghaan, pasado alas-7 sa gabii, adlaw'ng Lunes, Nobiyembre 4, 2024.
Ang Bureau of Fire Protection-EMS Unit nakadawat og verbal communication gikan sa Quick Response Team sa maong eskuylahan labot sa maong insidente.
Sa impormasyon nga nakuha sa BFP-EMS nga 10 ra ka tawo ang kapasidad sa elevator apan 18 ka tinun-an ang dungan nga nisakay gikan sa 5th floor.
Nakaabot sa ground floor ang elevator apan wala moabli ang pultahan niini hinungdan nga sila na-trapped.
Pag-abot sa kabomberohan sa dapit si Senior Fire Officer 1 Jeric Alburo diha na nila nasayran nga 18 ka tinun-an ang na-trap sa sulod sa maong gamay nga elevator.
Matud pa sa BFP risgo kaayo ang sitwasyon kay posibleng ma-suffocate ang mga tinun-an.
Gamit ang bara de kabra, mga tubo, kahoy ug uban pang gamit pugsanon nilang giablihan ang elevator.
Si FO2 Mari Carmeli Tudtud mipakalma sab sa mga tinun-an ug si FO2 Ernido Baya Jr., maoy nag kontrol sa mga tawo.
Si FO1 Justin Englaterra uban ang laing responders maoy niabli sa pultahan nga miresulta nakagawas gyud nga luwas ang 18 mga tinun-an.
Nilanat lang og 5- minutos ang pag rescue sa kabomberohan sa tinun-an.
Wala pay gihatag nga pamahayag ang maong eskuylahan bahin sa maong insidente. IBM BANAT NEWS