CEBU, Philippines — Gipaningkamutan sa Cebu City Anti-Mendicancy Board nga mahatagan og livelihood program ang mga magpakilimos sa siyudad aron mamenosan na ang mga libudsuroy ug mangayo diha sa kadalanan.
Si Anecita Suico, assistant OIC sa Department of Social Welfare and Development nagkanayon nga nakig-alayon na sila sa Department of Manpower Development and Placement aron mahatagan og kahigayonan ang mga magpakilimos nga adunay makat-onan nga kahanas sa usa ka butang nga magamit aron makasulod sila og trabaho.
Si Gladys Gay Vaño, executive director sa CCAMB nagkanayon 70 porsyento sa populasyon nga kanunay nila nga gi-rescue matag adlaw mao ang mga Badjao ug 5 porsyento lang niini mao ang mga Bisaya.
Matud ni Vaño nga nasayod ang mga magpakilimos sa pagpahugot sa ilang balaod nga “Stop Mendicancy” sa siyudad apan dili sila kapugos sa mga magpakilimos nga bisan og unsaon nila og pahimangno nga dili na mobalik sa kadalanan apan mamugos gihapon kini nga magpahatud sa ilang naandan nga mga pwesto gumikan kay giingong mao na kini ang ilang naandan nga buhaton “ang mangayo”.
Ang pangu sa CCAMB Dr. Lucille Mercado nagkanayon nga gipaningkamutan usab nila sa ilang buhatan nga mamenosan ang mga makililimos.
Nunot niini, gibutyag ni Mercado nga base sa ilang pakig-alayon sa mga nagkadaiyang ahensiya sama sa Cebu City Anti-Mendicancy Task Force, CCTO ug DSWS ilang nasayran nga kapin sa 20 ka hot spot areas sa north ug walo sa south ang ilang gitutokan diin anha magtapok ang kadaghanan sa mga makililimos.
Gipadayag ni Mercado nga dili nila madala kong ilang buhatan ra ang molihok hinungdan nakig-uban sila sa mga nagkadaiyang ahensiya ug lakip usab sa katawhan nga makiglambigit og manginlabot pinaagi sa dili na paghatag sa mga makililimos diha sa kadalanan ug sa mga sakyanan.
Si Raquel Arce, pangulo sa CCTO nagkanayon nga ang iyang mga sakop lakip sa i-deputized pinaagi sa information dissemination sa katawhan kabahin sa nalatid sa balaod sa anti-mendicants ug kong dili mopatuo maisyuhan kini og citation tickets. Rowena D. Capistrano/BDB BANAT NEWS