Butanding nagpakita sa kadagatan sa Lapu-Lapu

CEBU, Philippines —  Gikalipay ni Lapu-Lapu City Mayor Junard “Ahong” Chan ang pagkadiskubre sa presensya sa whale shark o butanding diha sa kadagatan sa dakbayan.

Sa iyang post sa Facebook kagahapon, ang iyang caption “pagkamaanyag” nga nagpakita sa tulo ka mga hulagway sa gituohang usa ka gamay nga butanding nga nisaka sa taas.

Makita sa hulagway nga katin-aw sa tubig sa dagat ug ang background mao ang mga tag-as nga mga buildings sa siyudad.

Ang mga netizens nga nikomento puno sa pagdayeg samtang si Chan mitubag sa usa sa mga netizens nga tulo ni ka buok ang nakitang butanding sa lugar.

Dunay mga netizens nga nisugyot nga palawgan ang mga butanding aron dili na kini mopahawa.

Apan ang maong matang sa iho kanunay nga naglibut-libot sa kadagatan kun asa ang panon sa ilang pagkaon sama sa pino nga uyabang, planktons ug gagmay nga mga isda.

Kaning ilang pagkaon nagsunod sab sa dagan sa sulog, temperatura sa dagat, ug uban pa diin sila mabuhi ug kini mao say gisunod-sunod sa mga butanding.

Mipasidaan na ang Department of Environment and Natural Resources bahin niini kaniadto nga dili kini makaayo sa maong mananap sanglit magsalig na hinuon kini sa lawog sa tawo inay mangita og pagkaon sa natural nga paagi.

Sa nangaging mga bulan, dunay mga butanding nga nasigpatan sab sa kadagatan sa Cordova diha gihapon sa Hilutongan Channel buyon gihapon kun diin nakita ang mga butanding sa Lapu-Lapu.

Ang Department of Environment and Natural Resources (DENR) ug Bureau of Fisheries and Aquatic Resources (BFAR) misugyot na kaniadto pa nga iapil ang butanding sa listahan sa Appendix I sa Convention on Migratory Species (CMS) aron sila maprotektahan bisan asa sa kalibutan.

Samtang limitado pa kaayo ang mga impormasyon kabahin sa migration sa butanding, apan dinhi sa Pilipinas sagad sila magpakita gikan sa bulan sa Nobiyembre hangtud Hunyo, apan mas daghan sila sugod sa bulan sa  Pebrero hangtud sa Mayo tungod kay mas tin-aw ang kadagatan kay menus ang pagsige og ulan ug bagyo.

Sumala pa sa report sa National Geographic sa wala pa ang tuig 1998 dihang wala pa mapasar ang balaod pagprotihir sa mga butanding dinhi sa Pilipinas, gatosan ka butanding ang gipatay sa mga mananagat tungod sa karne ug silik niini.

Numero unong tigpanguha ug ingon man tigpalit og karne ug silik sa butanding ug tanang matang sa iho ang China.

Ang pagpangusog sa eco-tourism samtang dili tanan uyon, nakatabang kini og dako mga butanding tungod kay mas daghan na ang mga impormasyon bahin kanila u gang ilang proteksyon. (BANAT NEWS)