CEBU, Philippines — Dakpon sa kapolisan ang mga scalper o mga tawo nga mamakyaw og ticket sa mga barko unya ibaligya og mahal ngadto sa mga pasahero diha sa mga pantalan sa Dakbayan sa Sugbo karong panahon sa Kalag-Kalag.
Base sa report sa Cebu City News and Information nga atol sa convergence meeting sa Action Force Kalag-Kala ang Cebu Port Authority nipadayag sa ilang kabalaka mahitungod sa maong problema.
Matud ni Cebu City Police Office Director Antonietto Cañete nga dakpon nila kong aduna sila’y masakpan nga mga scalper.
Ang CCPO magpakatap usab kini og covert security aron ma-monitor ang mga pantalan sa siyudad.
Gi-awhag usab ni Cañete ang mga pasahero sa pag-report sa maong insidente aron nga walay mabiktima sa maong dili maayong buhat.
Gawas sa scalpers, dakpon usab sa Cebu City Transportation Office ang mga taxi driver nga masakpan nga mangontrata ug magpaburot sa ilang presyo sa pletehan diin dili mogamit og metro.
Gawas sa kapolisan ipakatap usab sa seaports, airports ug bus terminals ang mga sakop sa Bureau of Fire Protection, Philippine Coast Guard, Cebu City Transportation Office, PROBE sa city hall, force multipliers sama sa mga tanod ug volunteer groups aron motabang og monitor sa kahimtang sa siyudad sa panahon sa Kalag-Kalag.
Nunot niini, ang Cebu Port Authority moimplementar karong Oktubre 31 hangtud sa Nobiyembre 5, 2024na sa ilang Oplan Biyaheng Ayos Undas 2024 aron sa pag-manage sa paghugop sa mga biyahedor niining nagsingabot nga adlaw sa mga Santos ug kalag diin gilaoman ang pagdagsang sa mga pasahero.
Ang CPA uban ang Philippine Coast Guard, Maritime Industry Authority, Philippine National Police, Philippine Drug Enforcement Agency ug uban pang government agency adunay ipatuman nga mga desinyo alang sa pagpahugot sa ilang seguridad ug operasyon sa tanang pantalan sa Sugbo.
Si CPA General Manager Francisco Comendador III ni-highlight sa ka importante sa seguridad sa mga pasahero hinungdan nga mopahigayon sila og round the clock security sa mga adlaw nga nipatuman sila sa Oplan Biyaheng Ayos Undas 2024 ug mobutang usab sila og explosive detection dogs sa tanang CPA port terminals.
Niadtong Oktubre 25, 2024 ang CPA pinaagi sa Port Safety Security and Environmental Management Department nagtagbo uban sa mga representante sa mga shipping lines ug cargo handling service provider sa pag-reiterate sa critic safety and security measures nga ipahimutang panahon sa busy nga travel season.
Ang mga pasahero giawhag nga magpa-advance og book sa ilang tickets tungod kay ang CPA istrikto nga mopatuman sa “No Ticket, No ID, No Entry Policy” diin kadtong adunay ticket lang ug identification cards ang makasulod sa pantalan duha ka oras sa dili pa ang oras sa ilang paglarga.
Ang CPA niawhag nga molikay ug motaho batok sa scalpers nga naninda og ticket ubos sa mahal nga presyo.
Adunay Malasakit Help Desk and First-Aid Stations nga ipahimutang sa passenger terminals sa pagtubag sa mga concerns ug emergencies sa mga pasahero nga motumaw.
Subay usab niini, aron masiguro ang kaluwasan sa mga pasahero nga manguli sa mga probinsiya ug ubang lugar sa Sugbo sa pag-obserba sa Kalag-Kalag gipaubos sa random drug test ang mga drayber sa public utility vehicles sa Cebu South Bus Terminal (CSBT) kagahapon sa hapon. Matud ni Atty. Froilan Suarez sa operations division sa Land Transportation Office-7 nga gihimo nila ang kalihokan nga “Oplan Harabas: Project Undaspot” aron madeterminar ang mga drayber nga tiggamitan og ilegal nga drugas.
Niabot sa 51 ka drayber sa bus ug taxi ang napaubos sa random drug test.
Gihulagway ni Suarez nga usa kini sa mga pamaagi aron malikayan ang aksidente sa kadalanan.
Base sa taho gikan sa PDEA-7 walay mga nagpositibo nga drayber sa maong drug test. Si Suarez nagkanayon nga kadtong mga drayber nga magpositibo sa drug test kompiskahon sa LTO ang ilang driver’s license ug ipaubos sila sa confirmatory test sa PDEA.
Ug kon magpositibo usab sa confirmatory test ipaubos sila sa rehabilitation inabagan sa PDEA. (Rowena D. Capistrano, Gie-Ann Tapic ug Decemay P. Padilla/BDB) BANAT NEWS