CEBU, Philippines — Upat ang naangol human aksidenteng nibuto ang blow torch nga gigamit sa paghimo og furniture sa usa ka shop diha sa Sitio Kulo sa Barangay Pajac sa Siyudad sa Lapu-Lapu sa miaging Domingo sa hapon.
Si Fire Officer One Vincent Rhey Reyes sa Lapu-Lapu Fire District miila sa mga naangol nga mao sila si Jeffrey Taghoy, 20, Jay-r Inot, 20, Monding Amistad, 30 ug Owen Alejo, 22, mga trabahante sa maong establisamento nga gipanag-iya sa usa ka Victor Ramos .
Matud pa ni Reyes dali ra hinuon napawong ang kalayo ug ang mga biktima dali usab nga nadala sa tambalanan.
Si Nagiel Banacia, pangulo sa City Disaster Risk Reduction and Management Office ( CDRRMO) miawhag sa mga establisamento nga naggamit og gas sa ilang operasyon nga hatagan gyud og importansiya sa safety sa ilang mga trabahante ug sa ilang palibot.
Matud pa niya nga kinahanglang inspeksyonon gyud kanunay ang mga tangke sa gas nga gigamit sa ilang operasyon.
Dili kini ibutang sa sirado o naboot nga bahin aron makahungaw ug dili moulbo. (BANAT NEWS)