CEBU, Philippines — Nagpabilin nga numero uno nga gobernadora lukop nasud pag-abot sa performance si Gobernador Gwendolyn Garcia, base sa ikaduhang quarter nga survey nga gipahigayon sa RP-Mission and Development Foundation Inc.
Sa maong survey nga gitawag nga “Boses ng Bayan”, si Garcia nakakuha og 94.5 % nga rating, mas taas kon itandi sa 93.7% nga performance rating nga nakuha sa gobernadora sa unang kwarter karong tuiga.
Tungod sa maong rating, si Garcia ang nagpabilin nga numbero uno gikan sa 81 ka gobernadora sa tibook nasud sa ikaduhang higayon.
Ikaduha ni Garcia mao si Quirino Province Governor Dax Cua nga nakakuha og 94.2% nga rating; sunod si Zamboanga Sibugay Governor Ann Hofer nga 92.3% ang rating;ikaupat si Cavite Governor Jonvic Remulla nga 91.6% ang nakuha nga score ug ikalima si Batangas Governor Dod Mandanas nga 91.4% ang performance rating.
Si Dr. Paul Martinez ang executive director sa RP Mission nagkanayon nga ang maong survey nagpakita sa liderato ni Garcia ilabina pag-abot sa “hands-on governance”.
Matud ni Martinez, bisan sa kadako sa Probinsya sa Sugbo, regular gihapon kini nga giduaw sa gobernadora ang matag lungsod ug siyudad nga sakop sa lalawigan aron direkta nga mokunsulta sa mga konstituwente niini ug mga lokal nga lider.
“Governor Gwen has consistently engaged with local stakeholders, ensuring that her initiatives and programs are well-coordinated and effectively implemented. Her policies, which frequently result from these grassroots consultations, have received widespread support due to this strong relationship with the community and municipal leaders,” matud ni Martinez.
Sa nahisgutan nga survey, 10, 000 ka mga respondents ang gikahinabi pinaagi sa face-to-face interview. (BANAT NEWS)