30 balay sa Labangon, naugdaw

CEBU, Philippines — Moabot 30 ka panimalay ang naapektahan sa sunog nga niulbo sa may Bugnay 2, Sitio Lutaw-Lutaw, Barangay Labangon ning Dakbayan sa Sugbo, Sabado sa buntag.

Ang sunog naglambigit og residential houses nga giingong nagsugod sa panimalay ni Arlinda Pamugas.

Alas sais trentay singko sa buntag niulbo ang maong sunog ug hingpit nga na fire out alas 8:17 sa buntag. Gibana-bana nga moabot sa P1.3 milyones ang danyos sa sunog diin walay gikataho nga nakalas o naangol.

Sumala pa sa pasiunang pag-ihap, 28 ka balay ang hingpit nga naugdaw ug duha ang nakan-an sa kalayo nga gipuy-an og 45 ka pamilya o 180 ka individual.

Padayon pa ang gihimong imbestigasyon ni FO3 Fulbert Navarro kung unsay hinungdan sa pag-ulbo sa maong sunog.

Mopatawag pa ang kabomberohan sa tag-iya sa panimalay aron sayran ang hinungdan sa pag-ulbo sa maong sunog.

Pipila sa mga residente ang nibutyag nga dali ra kaayo ang pagkaylap sa maong kayo human kalab-anan sa mga panimalay ginama sa light materials.

Usa ka lalaki ang kasamtangan nga gikustodiya usa human kini maoy gipasanginlan sa mga silingan nga maoy hinungdan sa sunog.

Apan ang maong lalaki hugot nga nihimakak nga siyay hinungdan sa pag-ulbo sa sunog tungod kay limpyo iyang konsensya ug gihigugma usab niya ang iyang pamilya.

Sa talaan sa Department of Social Welfare and Services nakatala sila 48 ka balay ang apektado diin 77 ka pamilya o 291 ka individuals.  Ang mga nasunogan kasamtangan gipahimutang sa Bliss Elementary School.

Matud pa ni Portia Basmayor ang pangulo sa DSWS ang kagamhanan sa dakbayan nanghatag og packmeals sa mga biktima sa sunog.