CEBU, Philippines — Lima ka tawo ang nadakpan samtang usa ka drug den ang giguba atol sa buy-bust operation sa Philippine Drug Enforcement Agency(PDEA) Cebu Provincial Office uban ang Cebu City Police Station 11 sa Sitio Panagsama, Barangay Basak San Nicolas, dakbayan sa Sugbo niadtong Biyernes sa hapon, Agosto 9, 2024.
Nadakpan ang subject sa buy-bust operation ug ang drug den maintainer nga si Erwin Cabreros, 38 anyos, wala'y trabaho.
Nasikop sab ang upat ka mga tawo nga tigbisitahan sa drug den nga sila si Nesel Cariman, 40; Kem Damarillos, 30 anyos; Christian Lou Arcelo, 35 anyos, construction worker; ug Ronil Baclay, 38, e-bike driver.
Nasakmit sa mga operatiba ang pito ka putos sa gituohang shabu nga nitimbang og 10 grams ug nagkantidad og P68,000 ug uban pang drug paraphernalia.
Gipaubos og usa ka semana nga case build up ang subject sa operasyon human makadawat og impormasyon ang mga operatiba sa illegal nga kalihukan sa suspect. Nasuta nga maka dispose kini og 10 ngadto sa 15 gramos kada semana.
Ang mga ebidensiya nga nakuha gisumetir na sa laboratory alang sa chemical analysis ug proper disposition.
Kasong kalapasan sa Sections 5, 6, 7, 11, ug 12, Article II sa Republic Act 9165 ang kasong isang-at batok sa mga suspetsado. (BANAT NEWS)