Garcia misaad nga mahuman gyud ang CBRT
CEBU, Philippines — Temporaryo na sab gipahunong ang katukoran sa bus station features sa Cebu Bus Rapid Transit (CBRT) samtang giporma pa ang mga project coordinators gikan sa Cebu City Government bag-o nga momonitor sa kalambuan niini.
Si acting Cebu City Mayor Raymond Alvin Garcia sa pakighinabi kagahapon (Biyernes), Agosto 2, 2024, miklaro nga bisan pa sa pagpahunong sa pagtukod sa bus station ang ubang mga bahin sa proyekto magpadayon.
Para ni Garcia, dugay na gyud nga adunay usa ka point person gikan sa dakbayan nga magmonitor sa kalamboan sa CBRT project. Sa pagkakaron, adunay natukod nga Project Monitoring Office nga pagadumalaon ni Engr. Maria Conception T. Encabo gikan sa City Planning and Development Office (CPDO), Lawyer Michelle M. Descartin, Engr. Roteza Gloria B. Cantillas, ug Carme P. Labitad.
Dugang pa niya, nagpadayon ang civil works para sa Package 2 diin mipirma usab siya og letter offers alang sa Road Right of Way (RRW) acquisitions.
Mao kini ang mga lugar nga maapektuhan sa proyekto diin ang gobyerno paliton kini nga mga luna gikan sa mga private owners.
Si Garcia niingon nga aduna nay budget appropriation gikan sa Department of Transportation (DOTr) nga gi-download ngadto sa Cebu City Government para maoy ipalit sa mga pribadong yuta nga maigo sa CBRT.
Ang mga informal settlers nga nag-okupar sa mga lugar nga maapektahan ibalhin sa usa ka luna sa Barangay Tejero. Matud niya desidido gyud siyang mahuman kining CBRT. IBM BANAT NEWS
- Latest
