CEBU, Philippines — Ang Kapitolyo gikatakdang mo-host sa welcome dinner sa mga mayor sa Mindanao Island Cluster Conference (MICC) sa League of Municipalities of the Philippines (LMP) karong Agosto 7, 2024.
Si Mayor Jason John Joyce sa munisipalidad sa Jose Abad Santos nibisita kang Gobernador Gwendolyn Garcia niadtong Hulyo 26, 2024 diin nihangyo kini og suporta gikan sa Kapitolyo aron magmalampuson ang kalihokan sa mga mayor gikan sa Mindanao. Si Joyce maoy bise presidente sa LMP Mindanao.
Matud niini nga moabot sa 200 ka mayor gikan sa nagkadaiyang lungsod sa Mindanao ang motambong sa maong kalihokan aron mag-inambitay sa mga estratehiya, ideya ug best practices alang sa sustainable development.
Ang Jose Abad Santos usa ka first class nga munisipalidad sa Davao Occidental.
Kauban ni Joyce sa pagbisita kang Garcia ang presidente sa LMP-Cebu Chapter nga si Daanbantayan Mayor Sun Shimura.
Gawas sa pagdawat sa imbitasyon gidapit usab ni Garcia ang mga mayor sa Mindanao nga motambong sa selebrasyon sa ika-455 nga kasumaran sa Probinsiya sa Sugbo sa Agosto 6, 2024.
Ang conference sa mga mayor sa Mindanao magsilbi nga paagi alang sa pagpalambo pa sa kolaborasyon ug pagbinayloay og kahibalo sa mga LGU. (BANAT NEWS)