Rason sa pag-resign

Human hatagi'g mga dautang kahulogan ang pag-appoint ni Vice President Sara ‘Inday’ Z. Duterte sa iyang kaugalingon og designated survivor (DS), haskang daliang nakapatuyang og paghot sa mga itoy ni Presidente Bongbong Marcos Jr. (PBBM). 

May kongresistang miingon, delikado ang maong tiaw ni Inday kay dako kuno kining death threat sa ilang pinalanggang PBBM. Busa gusto nilang kasohan dayon si Inday.

Sa usa ka ambush interview, giklaro ni Inday nga ang pag-ingon niyag DS: “Dili to siya joke. Dili pud to siya bomb threat. I think, many missed the point. So, para sa akoa, kon wala ka makasabot sa first time, I don’t think you deserve an explanation.” Ingon niini kahait si Inday. Mao nga ang mga tawong nagpabugobugo, dili gyod makadulot. Wala silay luna sa iyang dughan.

Sa laktod, hagbay rang namatikdan ni Inday, nga bisan unsay iyang ipamahayag sulod ug gawas sa Kongreso-Senado, kontrahon gyod siya sa mga hinigtang itoy sa Marcos-Araneta-Romualdez team, kinsa maoy hinungdan nganong gibiyaan sa agila sa Davao City ang mga buaya nga gustong motukob niya ug milupad pataas sa tumang kagawasnon.

Kagawasnon sa paghunahuna-paghimog kinaepektibohang paagi unsaon aron iyang maluwas ang makaluluoyng kahimtang sa katawhan ug atong nasud nga gidominar sa anti-good governance nga pagpamunoan?

Sa pagsulat niini, tulo ra ka hinungdan ang gitug-an ni Inday atubangan sa media nganong miresayin siya? Una, personal (ilang duha ni PBBM). Ikaduha, trabaho (Secretary of National Defense baya iyang gusto, pero Department of Education ang gihatag ni PBBM) ug ikatulo, nasod o katawhan (wala matuman ni PBBM ang unsay iyang gisaad sa atong nasod.) Diin, hasta si Inday nabudol. Sanglt, kon unsay gikasabotan nila ni Bongbong diha sa pagkatukod sa BBM-SARA Uniteam, kalit lang kining na-amnesiya dihang sila maoy midaog.

Wala mohatag og detalye sa media si Inday kay kinahanglan kuno kini lingkoran sanglit taastaas ang kutay niining gitipigan niyang political tandem story nilang duha.

Gikan sa giunsa siya pagpasugot nga makig-tandem ngadto na sa moduha ka tuig nga pagka-presidente ni PBBM. Diin ang maong sweet memories nahimong very sour, bitter and toxic.

Mao na kaha kini ang giingon nga ‘the end is near, or a new beginning after the end?’