CEBU, Philippines — Nasikop sa hiniusang pagpangronda ang upat ka mga tawo diha sa drug den sa Zone Lato, Barangay Calawisan sa Siyudad sa Lapu-Lapu alas 10 pasado ang takna sa miaging gabii.
Ang mga sakop sa Presinto 3 sa Lapu-Lapu City Police Office (LCPO) nga gipangulohan sa hepe niini nga si Police Major Jaypee Dagame ug Philippine Drug Enforcement Agency (PDEA) 7 mironda sa drug den sa maong dapit human sila nakadawat og impormasyon bahin sa operasyon niini sa lugar.
Nadakpan ang matud pa ang duha nga maoy nagpadagan sa maong drug den nga sila si Markelee Cabalhog, 34, ug Montano Alarde, 35.
Atol sa maong pagpangronda naabtan sab ang giingong duha ka mga kustomer nga sila si John Kinglee Alcala, 34, ug Anthony Toring, 31, pulos nagpuyo sa maong dapit.
Sa nasayran nga nakahipos og kasayuran ang mga otoridad bahin sa maong drug den hinungdan sa gilusad nga operasyon.
Atol sa maong pagpangronda ilang nasakmit nga mga pakete sa gituohang shabu ug mga drug paraphernalia Ang mga dinakpan kasamtangan karong gitanggong sa holding facility sa PDEA 7.— Romeo T. Limpangog/IBM BANAT NEWS