CEBU, Philippines — Ang Department of Education Cebu City School's Division mo turn-over sa tanan nga equipment nga gipamalit atol sa Palarong Pambansa 2024 nga gipahigayon sa siyudad sa miaging semana ngadto sa kagamhanan sa Dakbayan sa Sugbo.
Kini ang gibutyag ni Adolf Aguilar, DepEd Cebu City Division Assistant School's Division Superintendent.
Matud pa ni Aguilar, kini ilang pamaagi sa pagpakita sa suporta sa kagamhanan sa dakbayan sa ilang tinguha pag establisar og comprehensive sports program.
Dugang pa ni Aguilar ang mga television sets nga napalit sa Palaro kay ipangapud-apod sa mga tulonghaan ilabi na kadtong anaa sa mga bukiran nga barangay siyudad.
Gipadayag ni Aguilar ang pag turn-over nila maoy suporta nila ilabi na sa pagpalambo sa daghan mga Sugbuanon nga atleta sa umaabot.
Nipadangat usab sa iyang pasalamat si Aguilar sa gihatag nga suporta sa Palarong Pambansa 2024.
Ang Palarong Pambansa 2024 dili pa lang dugay natapos nga gipahigayon sa Dakbayan sa Sugbo ug hingpit na usab kining ipahigayon sunod tuig didto sa Ilocos Norte ug sa 2026 sa Agusan del Sur.— IBM BANAT NEWS