Naamong sa pagpusil

CEBU, Philippines — Naangol ang usa ka 64-anyos nga babaye human kini naamong sa nahitabong pagpamusil diha sa T. Padilla Extension, Barangay Tejero, Dakbayan sa Sugbo niadtong Martes sa gabii.

Ang biktima mao si Elina Belandres, residente sa Sitio Tevil, Barangay Tejero sa nahisgutang siyudad.

Base sa imbestigasyon sa Waterfront Police Station 3 sa Cebu City Police Office nga lahi ang target sa kriminal.

Dihang gipusil sa kriminal ang iyahang target nakalikay kini ug nakadagan sa sudlunon nga bahin sa dapit.

Gisundan sa gun man ang target ug gipusil pag-usab apan ang duha ka bala nilusot sa bongbong sa usa ka establisamento hinungdan nga naigo ang bukton sa biktima kinsa nag-estambay diha sa lugar niadtong higayona.

Human sa maong insidente daling nisibat ang gun man pahilayo sa lugar.

Ang kapolisan sa Waterfront Police Station nibutyag nga aduna na sila’y person of interest sa maong hitabo.

Kalambigitan sa ilegal nga drugas ang gisubay nga motibo sa maong pagpamusil tungod kay nakadawat og impormasyon ang kapolisan nga ang target nakadawat og text message gikan sa amahan nga pabantay-bantayon tungod kay upsilon kini sa iyahang amo human wala maka-remit sa halin sa ilegal nga drugas hinuon i-verify pa sa kapolisan ang maong impormasyon. (BANAT NEWS)