CEBU, Philippines — Duha ang namatay ug usa ang naangol samtang laing usa ang nakasibat sa nahitabong duha ka insidente sa pinusilay.
Sa Consolacion, duha ka grupo ang nagpinusilay ug naapil ang mirespondeng mga sakop sa Municipal Intelligence Unit (MIU) sa Consolacion Police Station alas 5 pasado ang takna sa miaging Lunes sa hapon Hulyo 15, 2024 sa Sitio Mapo, Barangay Garing, Lungsod sa Conslolacion.
Ang team sa MIU sa Consolacion Police Station miadto sa dapit tungod sa nadawat nga impormasyong dunay nagpinusilay sa lugar.
Sa pagabot sa mga polis sa lugar, naabtan nila ang duha ka mga lalaki nga nag-angkasay sa motorsiklo ug padulong na mosibat hinungdan nga gigukod nila kini apan gipabuthan sila niini.
Gibawsan sila pagpusil sa mga polis ug naigo si Vincent Diaz Yap, 27, taga Barangay Pulpogan sa maong lungsod nga nipabuto sa mga polis gamit ang KG9 submachine pistol.
Armado sab og kalibre 45 nga pistola ang kauban niya nga giila lamang sa alyas nga Botyok nga nakaikyas padung sa bukid.
Nasayran nga sa wala pa sila maabot ang mga polis, nakigpinusilay ang duha sa usa ka Florencio Ermac Zalde, 35, nagpuyo sa Sitio Mapo Barangay Garing kinsa naigo sa walang tiil.
Pagabot sa mga polis, gitahan ni Zalde ang iyang dili lisensyadong AR- 15 rifle nga dunay magazine ug mga bala sa .9mm. Si Yap ug Zalde gidala sa tambalanan apan si Dr. Fidel Cascabel mideklarar nga patay na ang nahauna (Yap).
Nakuhaan gikan ni Yap ang usa ka KG-9 submachine pistol mga ID, baseball cap, mga bala sa maong armas, usa ka itom nga Yamaha Mio nga may plakang GD-98381.
Gisusi pa sa kapolisan kun unsay hinungdan kun nganong nagpinusilay ang duha ka habig. BANAT NEWS