CEBU, Philippines — Gipasidunggan ug gipahalipayan sa Sangguniang Panlalawigan sa Probinsiya sa Sugbo ang Filipino-Japanese judoka nga si Kiyomi Sarausad Watanabe tungod sa garbo nga gihatag niini isip usa ka atleta nga adunay dugong Sugboanon. Si Watanabe kwalipikado nga maoy morepresentar sa Pilipinas sa umaabot nga Paris Olympics karong buwana.
Ang amahan ni Watanabe usa ka hapon samtang Pinay ug taga Dakbayan sa Mandaue ang iyang inahan.
“She hails from Labogon, Mandaue City. It’s a barangay where I come from, and we are very proud of her accomplishment which has inspired and motivated our young athletes”, matud ni Bokal Glenn Anthony Soco sa taho sa Capitol Information Office.
Si Watanabe maoy nag-inusarang babayeng atleta nga nalakip sa mga elite line sa judoka sa Olympics diin nahimutang siya sa ika-92 nga rango sa tibuok kalibutan ubos sa women’s 63 kg category.
Nasayran nga si Watanabe usa ka four-time champion sa Southeast Asian Games ug silver medalist sa Asian Games.
Ang iyang pag-apil sa Paris Olympics maoy ikaduha niya nga higayon sa Olympics. — BDB BANAT NEWS