CEBU, Philippines — Nasikop ang 14 ka mga giingong ushers sa illegal swertres sa gihimong operasyon sa Criminal Investigation and Detection Group (CIDG)-7 ug mga police stations sa Probinsya sa Sugbo.
Unang nadakpan sa CIDG-7 ang upat ka mga tawo nga matod pa mga usher sa illegal nga sugal nga swertres dihang gilusad nila ilang Oplan Bolilyo niadtong Huwebes sa gabie, Hunyo 20, 2024.
Ang mga nasikop naglakip sa usa ka 73 anyos nga taga Campo 8 nga ilahang naakohang nangisyu. Nakuhaan kini og paraphernalia sa swertres sama sa tally sheet ug uban pa.
Laing nadakpan tulo sab ka babayeng ushers diha sa Purok QCRO, Barangay Das Lutopan, sa sitio Tambis, Barangay Poog, ug ang taga dakbayan sa Toledo.
Gawas sa upat, nakadakop sab og napulo ka mga ushers sab ang nagkadaiyang police station sa probinsya sa Sugbu sa hiniusang anti-illegal gambling operation sa ilang mga hurisdiksyon. Sa dakbayan sa Carcar lima ang nadakpan, samtang sa Carmen ug Compostela nasikop ang laing upat sab ka mga ushers.
Sa lungsod sa Asturias nadakpan usab ang usa ka 33 anyos nga babaye nga nakuhaan usab og mga ebidensya sa kapulisan.
Ang maong mga illegal swertres ushers ang napasakaan nag kaso sa kalapasan a RA 9287 kun Anti-Gambling Law. — /IBM (BANAT NEWS)