CEBU, Philippines — Anaa karon sa costudiya sa Barili Police Station ang usa ka driver sa trak sa semento human kini nabangga ngadto sa usa ka bangko sa lungsod sa Barili, miaging adlaw Hunyo 22, 2024.
Nahitabo kini alas 2:30 sa hapon diha sa National Highway sa Brgy. Poblacion, sa maong lungsod.
Ang PD 10 Isuzu Ten wheeler Truck nga nagtangag sa plate number TWW 204, gimaneho ni Joemarie Tolentino Delmonte, taga Victorias City, Negros Occidental.
Kini nangangkon nga nikagar ang brake sa iyang trak samtang nagbiyahe paingon sa Brgy Tangil, Dumanjug.
Wala pa kini mahitabo, unang natapsingan sa trak ang trisikol nga gimaneho ni Edison Omblero Caballero, 49, taga Brgy. Mantalongon sa nahisgutang lungsod hinungdan sa pagkaangol niini ug sa lima niya ka pasaherong mga batang babaye.
Laing sakyanan sab nga nakaparadang Mazda Bonggo ang nadasmagan niini hinungdan nga nadarok ang maong sakyanan padung sa balay sa usa ka Roxan Orillo.
Ang trak nga nawagtangan na og brakes nalahos og bangga sa Landbank- Barili ug nakaigo sab sa giparking nga Toyota Hilux.
Samtang usa ka Victoria Evangeline Arnibal Eredera, 66, taga Brgy Sta. Ana, Barili ang gidala sab sa tambalanan human kini natagakan sa kargang semento sa maong trak.
Ang mga opisyal sa Barili Police Station, pinangulohan ni PMSg John Robert Sacan, daling niresponde sa dapit human gipahibawo sa usa ka concern citizen.
Kasamtangang gitanggong sa police station ang drayber sa maong trak samtang nagpaabot sa kaso nga ipasaka batok kaniya.
Gisusi pa ang kinatibuk-ang kantidad sa danyos sa maong hitabo. — John Geron Encabo, /IBM (BANAT NEWS)