CEBU, Philippines — Gibuksan kagahapon ang First Ouano-Dizon Congressional Cup sa Siyudad sa Mandaue nga ubos sa pagpasiugda ni Lone District Representative Emmarie "Lollypop" Ouano-Dizon.
Ang maong kalihokan gisugdan sa pagparada sa 115 ka kuponan gikan sa 25 ka barangay sa siyudad diin nisubay sila diha sa dalan Gerardo Ouano Avenue ug diha nagtapok sa sulod sa Baranay Opao Gym diin nagpaabot ang opisyales sa kagamhanan nga gipangulohan ni Opao Barangay Kapitan Nixon "Jojo" Dizon.
Nitambong sa maong pagbukas sa labing una nga indigay sa paugnat sa kusog ang pipila ka mga incumbent barangay captain ug mga kanhi barangay kapitan sa maong dakbayan.
Samtang special guest usab ang inila ug volleyball superstar nga si Cherry Ann "Sisi" Rondina.
Sa iyang pamahayag, si Dizon nagkanayon nga ang Ouano-Dizon Congressional Cup ang langkuban sa mga atleta nga mga babaye ug lalaki nga kategoriya alang sa volleyball games sa mga junior, senior ug 40-above divisions alang sa basketball games.
Matud ni Dizon nga gilangkuban sa 1,800 ka atleta ug 115 ka kuponan gikan sa 25 ka mga barangay nga nisalmot sa maong indigay sa paugnat sa kusog.
Sa maong pagbukas gipili usab ang tulo ka mananaog gikan sa 25 ka muses sa matag kuponan. — /BDB (BANAT NEWS)