Tourism forum dinhi sa Sugbo salmotan sa 300 ka delegado

CEBU, Philippines — Dili momenus sa 300 ka mga delegado gikan sa nagkadaiyang nasud ang motambong sa United Nations Tourism Organization (UNTO) Joint Commission Forum nga ipahigayon sa Sugbo nga gikatakda karong Hunyo 26 ngadto sa 28.

Ang mga delegado gikan sa dili momenus 30 ka mga nasud nga miyembro sa UNTO sama sa Australia, Japan, China, South Korea, Malaysia, Indonesia, Papua New Guinea, Laos, Vietnam, Spain ug uban pa nga motambong sa 36th Joint Meeting of the UN Tourism Commission for East Asia and the Pacific ug sa UN Tourism Commission for South Asia (36th CAP-CSA).

Ang UN Tourism Regional Forum on Gastronomy Tourism for Asia and the Pacific ipahigayon usab sa Sugbo sa susamang petsa sanglit ang Pilipinas pinaagi kang Tourism Secretary Christina Garcia-Frasco, nakakuha man og position isip usa sa mga lider sa UNTO. Isip pagsuporta sa iyang anak, si Gobernador Gwendolyn Garcia nag-andam sa ipahigayon nga technical tour sa mga delegado ngadto sa tulo ka mga top-tourism destination sa Probinsiya sa Sugbo. Sa Hunyo 27, ang technical tour sa usa ka grupo adto mosuroy sa Camotes Island, ang laing grupo adto sa lungsod sa Dalaguete ug Argao heritage sites samtang ang ika-tulo nga grupo adto mopadulong sa Aloguinsan alang sa pagsuroy sa Hermits cove ug sa Bojo River Cruise.

Subay niini mianunsyo si gobernador Gwendolyn Garcia niadtong Hunyo 21 nga mohatag og subsidiya ang Kapitolyo ngadto sa mga LGUs nga maapil sa kalihokan ilabina ang mga lungsod nga bisitahon sa mga delegado. (BANAT NEWS)