Admin officer gipusil patay

CEBU, Philippines — Patay ang usa ka 44-anyos nga Admin Officer II sa Barangay Mambaling sa Cebu City human kini gipusil patay sa wala pa mailhing suspetsado sa Sitio Micabaja, Barangay Duljo Fatima sa siyudad sa Sugbo kagahapon sa hapon.

Ang biktima mao si Edward Abayan, 44, Admin Officer 3 sa barangay hall sa Mambaling ug residente sa Sitio Puntod, Alaska, Barangay Mambaling.

Matud ni Police Major Efren Diaz Jr., hepe sa Police Station 11 sa Cebu City Police Office nga ang biktima nagkaon sa karenderya sa naasoy nga dapit sa dihang kalit kining gipusil gikan sa luyo.

Ang biktima naigo sa iyahang ulo nga maoy hinungdan sa iyahang hinanaling                               kamatayon.

Matod pa sa mga saksi ang mamumuno nagsul-ob og long sleeve, naka kalo ug naka mask. Human sa pagpusil yano ra kining nilakaw palayo.

“Ganina may gustong sabihin ‘yung pamilya ng biktima pero nag ingon nalang sila nga moadto nalang sa opisina natin unya pagkahuman sa SOCO so gahulat-hulat ko nila sa opisina kay naa daw sila’y isulti basin makatabang ni sa imbestigasyon nato,” matud ni Diaz.

Si Kapitan Seller Salvador sa Barangay Mambaling, nibutyag gusto pa siya magpakisayod sa kapulisan may kalabutan sa nahitabo kang Abayan.

Sumala pa niya aktibo nga trabahante ug maoy tig follow-up sa mga sugo sa City Hall ang biktima.

Ang biktima giingong Enero  ning tuiga kini nagsugod sa iyang trabaho sa barangay.

Dugang pa ni Salvador, ang barangay andam nga motabang sa biktima ug dili lang sa trabahante sa barangay lakip sa tanan mga tawo ilabi sa mas nanginahanglan.

Samtang hustisya ang panawagan karon sa mga higala ni Abayan, kinsa giila nila nga maayong tawo ug daghan nga natabangan bisan ginagmay lang ilabi na panahon sa Covid-19 pandemic diin usa ang sitio niini nga apektado sa lock down.— Romeo Marantal, Rowena D. Capistrano (BANAT NEWS)