CEBU, Philippines — Gipahimangnoan ni Gobernador Gwendolyn Garcia ang tanang district engineers sa Department of Public Works and Highways (DPWH) sa Sugbo nga hatagan og kopya ang hunta probinsyal sa "specification" sa mga proyekto sa ahensya sa tuig 2024.
Ang deadline sa pagsumiter niini hangtud lang sa Hunyo 18.
Atol sa iyang tigom sa mga opisyal sa DPWH-7 gipangulohan sa assistant regional director nga si Danilo Villa Jr., si Garcia mipahinumdom sa provincial board ordinance no. 2023-02 nga nag require sa nga national government agencies ug government-owned and -controlled corporations (GOCCs) nga mokonsulta ug mokuha og pagtugot sa Kapitolyo una ipatuman ang mga proyekto niini sa Probinsiya sa Sugbo.
Si Garcia nagkanayon nga bisan og aprobado na ang maong mga proyekto sa provincial ug regional development council, kinahanglan gihapon mosumiter ang tanang engineering districts sa tanang dokumento nga kinahanglan ngadto sa Committee on Infrastructure sa provincial board subay sa gilatid nga lokal nga ordinansa.
“Ato ning himuon as a matter of procedure,” matud sa gobernador sa taho sa Sugbo News, ang news portal sa Probinsiya sa Sugbo.
Atol sa maong tigom, gi-call out sa gobernador ang third engineering district nga kasamtangang nagpatuman sa solar lighting sa Transcentral Highway sa Balamban diin nagplano usab ang Probinsiya pagpatuman sa susamang proyekto. (BANAT NEWS)