Duha ka sakyanan nga gi-abandonar sa Talisay ipasusi sa HPG

CEBU, Philippines — Ipasusi sa taga City of Talisay-Traffic Operation Development Authority (CT-TODA) ngadto sa Highway Patrol Group (HPG-7) ang duha ka mga sakyanan nga gipangbiyaan sa dakbayan sa Talisay.

Kini kung dili gyud mopatim-aw ang mga tag-iya niini diha sa buhatan sa CT-TODA hangtud karong adlawa.

Tinguha nila nga masuta kung ang duha ka sakyanan gigamit ba kini sa ilegal o krimen.

Si Jonathan Tumulak, pangu sa CT-TODA mitug-an nga dunay itom nga SUV ang giparada daplin sa Cebu South Coastal Road (CSCR) habig sa sitio Kalmar, Barangay Lawaan 1 niadto pang Sabado sa gabii.

Usa ka puti nga SUV sab ang gireklamo tungod kay giparada kini sa pribadong luna diha sa Barangay Tabunok tulo ka adlaw na ang nakalabay hinungdan nga giclamp ug gi tow ang mga sakyanan paingon sa buhatan sa CT-TODA.

Gipanawagan ang mga tag-iya sa maong mga sakyanan nga mobisita sa buhatan sa CT-TODA aron ila na kining makuha. (BANAT NEWS)

Show comments