SACLEO niresulta sa pagkasikop sa 81 ka tawo

CEBU, Philippines — Nakadakop ang Police Regional Office (PRO)-7 og 81 ka mga drug personalities atol sa ilang duha ka adlaw nga Simultaneous Anti-Criminality Law Enforcement Operations (SACLEO) gikan sa Hulyo 7 hantod sa petsa 9 sa samang buwan ning tuiga.

Nasakmit sa maong operasyon ang 1,377.84 grams sa gituohang shabu nga nagkantidad og P9.3 million diin 81 ka drug personalities ang nadakpan.

Nagkanayon si Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin nga mga dagkong balor sa illegal nga drugas ang makuha sa mga operasyon kini gumikan kay ang Sugbo nahimong transhipment sa binsa unsang matang sa illegal nga drugas gikan sa ubang lugar.

“Naay mangagi diri sa Cebu unya ang atoang mga operatiba ila gyud ng gina track which resulted in a significant nga confiscation, kining atoang mga operations diri sa Central Visayas will not only benefit Region Seven but other Regions also, mao ng hingusgan gyud nato kay dili raman kita maoy maka benefit ani kun dili ang ubang lugar pud sa Visayas ug Mindanao,” sigon ni Pelare.

Nakatabang sab ang subsob nga kampanya sa kapulisan batok sa illegal nga drugas gumikan kay 62 porsiyento sa mga barangay sa rehiyon nadeklarar nga drug cleared.

“So mao na kini resulta karon sa paspas nga pagpanakop wala na moabot ang illegal drugs ngadto sa Kabarangayan, kinahanglan mosulod nato ang atong demand reduction strategy ilabi na ning pag rehab sa atong mga previous drug users,” ni Pelare pa.

Gihulagway sab ni Pelare nga dako og epekto ang subsob nga operasyon batok sa illegal drugs sa pagkunhod sa krimen sa Central Visayas. Gani gikan sa buwan sa Enero hantod sa Mayo ning tuig naa lang sa 1,464 ka krimen lang ang natala sa Central Visayas, ubos kini og 13 porsiyento itandi sa samang mga buwan sa tuig 2013 nga niabot og 1,671.

“Usa sa rason ani kining pagpanakop sa drug personality kay naa man gyuy relasyon ang paggamit sa shabu ug ang pag commit sa crime kay nakita man nato nga kining mga suspects sa robbery, physical injuries naay uban ani nigamit pud og illegal nga drugas”, asoy ni Pelare.

Sa Talisay City, 17 ka tawo ang nadakpan sa kapolisan sa Dakbayan sa Talisay sud sa usa ka semana nga operasyon. Samtang 220 gramos nga shabu ang nasakmit nga gibana-bana nga adunay kantidad nga P1,496,000.

Samtang sa Lapu-Lapu City, 2,854 ka mga tawo ang nadakpan tungod nakahimo og mga kalapasan sa mga lokal nga ordinansa ug sa balaod.

Kadaghanan niini nakalapas sa traffic local ordinance nga naisyuhan og citation ticket  nga miabot og 1, 145  ka mga drayber.

Naisyuhan sab og citation ticket ang 205  ka mga tawo nga naaktohan nga nag-inom sa publikong lugar ug 420 ang gipamulta tungod sa pagpanigarilyo sa daghang mga tawo. — Gabriel Bonjoc, Romeo T.  Limpangog (BANAT NEWS)