Phase 2 sa CBRT project aprubado na

CEBU, Philippines — Ang Cebu Bus Rapid Transit (CBRT) project nagpadulong na sa ikaduhang phase niini human ang Cebu City Council nihatag og pagtugot sa mayor sa dakbayan sa pagpirma sa deed of sale sa mga apektadong lote sa dalan Vestil sa Barangay Mambaling.

Kini human naaprobahan sa konseho ang paghatag og pagtugot kang Cebu City Mayor Raymond Alvin Garcia sa pagpirma sa Deed of Absolute Sale (DOAS) ug Deeds of Absolute Sale of a Portion of a Parcel of Land (DOAS-PPL) ingon man sa Memorandum of Agreement (MOA), isip representante sa Republika sa Pilipinas.

Ang resolusyon nga gi-endorso ni Konsehal Nestor Archival Sr., nag ingon nga subay kini sa provision sa MOA niadtong Disyembre 28, 2016 nga gihimo tali sa Department of Transportation (DOTr) ug sa Cebu City Government.

Duna usab kini attachment nga suwat gikan sa CBRT Project Management Office nga mipresentar og Legal Opinion nga nirekomendar nga kinahanglang dunay resolusyon gikan sa Cebu City Council nga mopirma sa maong mga dokumento aron mahimong pormal ang pagbalhin sa nga titulo sa maong mga luna.

Sama sa gipakita sa resolusyon sa Committee on Lot Acquisition alang sa BRT Project sa dihang nangayo sila og legal opinion, ang DOTr mao ang nangita sa mga lugar alang sa package 2 sa CBRT project nga anaa sa daplin sa F. Vestil. Street, Barangay Mambaling, dakbayan sa Sugbo.

Ang multi-billion nga CBRT project gilangkuban sa upat ka mga construction package diin Package 1 niini nagpadayon ang civil works.

Sa samang resolusyon, ang committee ni-enumerate og dili mominus 16 ka parcels sa mga yuta nga dunay kinatibuk-ang kantidad nga P84,328, 800.

Kining maong kantidad, gi-download na sa DOtr ngadto sa Cebu City Government alang sa gasto sa road right-of-way ug site acquisition (ROWSA).

Matod sab sa resolusyon nga ang Transfers of Certificate of Tittle hinganlan ngadto sa DOTr. Dugang pa nila nga ang mga tag-iya sa maong mga luna miuyon na sa pagpalit sa ilang luna.

Ang giingon nga resolusyon gipirmahan ni Leizel Calamba, Chairman sa Committee on Lot Acquisition alang sa BRT Project ug giaprobahan ni Mayor Garcia.

Sa ilang legal nga opinyon, ang Cebu City Legal Office (CLO) miingon nga usa sa mga obligasyon sa dakbayan nga nalatid sa 2016 MOA mao ang paghimo sa pagbalhin sa titulo pinaagi sa DOTr.

Ilang gipasalig nga sa pag-verify sa DOAS ug sa DOAS-PPL, nahisubay kini sa mga lagda ug pamaagi sa pagkuha sa right-of-way alang sa mga Infrastructure Projects ug girekomendar alang sa pag-aprobar sa konseho. (BANAT NEWS)