CEBU, Philippines — Nagtinabangay ang Inayawan Police Station sa Cebu City Police Office ug ang mga barangay ubos sa ilang hurisdiksyon aron magpabiling hapsay ug malinawon ang ilahang mga lugar.
Kini pinaagi sa pagpahigayon og Oplan Bulabog/Oplan Disiplina/Oplan Bakal Sita gabii sa adlaw’ng Sabado, Hunyo 7, 2024.
Ang kapulisan sa Inayawan Police Station pinangulohan ni Police Captain Yves Montejo, Deputy Station Commander for Administration ubos sa direktiba ni Police Major Jiceree Basitao nagpahigayon og Oplan Bulabog/Oplan Disiplina/ Oplan Bakal Sita sa mga establisemento sa ilang area of responsibility.
Gikuyogan og 25 ka mga barangay tanod gikan sa Barangay Kinasang-an, Barangay Inayawan, Barangay Poblacion Pardo, Barangay Cogon Pardo, Barangay Basak Pardo, Barangay Bulacao ingon man ilang GAD Staff ang mga polis.
Usa kini ka kalihukan nga himoon matag gabii nga estriktong nagpatuman sa curfew sa mga menor de edad, pagdili sa pagpanigarilyo sa pampublikong lugar, loitering, liquor ban sa publikong mga lugar apil na ang pagpatuman sa mga ordinansa sa siyudad ug uban pa.
Ang pagpahigayon sab og Oplan Bakal Sita gihimo aron masusi kun dunay kotrabando, ilegal nga armas ug ubang hinagiban nga gitago-tagoan ang mga tawong masita nga kabahin sa crime prevention sa PNP.
Nasayran nga 14 ka mga indibidwal ang giinspeksyon sa Oplan Bakal Sita ug 50 ka establisemento ang nabisita, hinuon wala pay nahatag nga impormasyon ang CCPO kun duna silay gidakop o nadakpan sa maong operasyon. (BANAT NEWS)