City hall kuwang og parkingan sa mga kliyente

CEBU, Philippines — Ang konseho sa Dakbayan sa Sugbo nihangyo nga ipagamit ang bakante nga lugar diha sa atubangan sa legislative building sa Cebu City Hall aron matubag ang mga reklamo sa kakuwang sa parking space sa mga kliyente sa city hall.

Si Cebu City Councilor Pastor “Jun” Alcover niluwat og privilege speech kabahin niini atol sa ilang regular session niadtong Miyerkules, Hunyo 5, 2024.

Sa maong privilege speech gipadayag ni Alcover ang kakuwang sa parkingan alang sa mga kliyente sa city hall.

“To be specific, the city government clients, are complaining for the lack of parking areas in Cebu City Hall. Daghan na kaayo ta’g nadawat nga reklamo, di ta katubag”, ni Alcover pa. Matud ni Alcover nga adunay pipila ka mga kliyente sa city hall ang nakasugat og panagbangi tungod sa pakingan aron mapahimutang og tarong ang ilang sakyanan.

Si Alcover nisugyot nga ang bakanteng lugar diha sa atubangan sa legislative building makahatag unta og pabor ngadto sa mga kliyente sa city nga makaparada og tarong sa ilang sakyanan.

“Dako kaayong hasul, alang sa mga tax payers ug uban pang mga kliyente, sa city hall nga wala silay kaparkingan”, ni Alcover pa.  Nasayran nga adunay mga kliyente nga anha mo parking duol sa Fort San Pedro diin layo kini sa city hall.

“So daghan kaayo’g mga bagulbol, daghan kaayog reklamo, nga atong madawat. And again, di ko katubag, ngano nga dili paparkingan ang atbang sa legislative building”, matud ni Alcover.

Subay niini, gisugyot usab ni Alcover ang pag-regulate sa parking system sa matag oras nga paggamit sa matag espasyo alang sa mga kliyente.

Si Alcover niduso og motion nga nag-awhag kang Acting Cebu City Mayor Raymond Alvin Garcia nga tan-awon ang posibilidad sa mga bakanteng espasyo atubangan sa legislative building nga magamit nga parking space. — BDB BANAT NEWS