CEBU, Philippines — Gusto ni Cebu City acting mayor Raymond Alvin Garcia nga gamiton ang taliabot nga Palarong Pambansa aron palamboon ang sports tourism dinhi sa Sugbu pinaagi sa pagpakigalayon sa ubang mga mayor sa Dakbayan sa Mandaue, Lapu-Lapu ug ni Governor Gwendolyn Garcia.
Gituki nila kini nakalabay nga mga adlaw diha sa Kapitolyo. Atol sa tigum nitambong sila Mayor Jonas Cortes sa Mandaue City, Mayor Junard Chan sa Lapu-lapu City ug ang gobernador lakip usab ang acting mayor sa siyudad sa Sugbo nagkasabot nga kinahanglang matanom sa hunahuna sa mga delegado sa Palarong Pambansa ang katahom sa tibuok Sugbu.
Ang maong kalihukan gikatakda nga ipahigayon sa Dakbayan sa Sugbo karon buwan sa Hulyo.
Gibutyag ni Garcia nga usa kini ka potensiyal sa turismo dili lang sa dakbayan sa Sugbo apan lakip na ang tibuok probinsya sa Sugbo maong kinahanglang duna gyuy koordinasyon ang tanan. Lakip sa natuki sa maong tigum nga aduna unyay kaadtoan ang mga delegado labi na kadtong walay mga dula, nga malakip usab ang mga packages para sa mga suroyanan sama sa kadagatan ug uban pa.
Gihisgutan usab sa maong tigum ang posibilidad nga mo host usab og mga duwa ang mga silingan nga dakbayan sa Mandaue ug Lapu-Lapu.
Gisabotan usab ang paghatag og prebilihiyo o discounts ang mga delegado sa mga suroyanan sa Sugbu. – IBM BANAT NEWS