Mitahan ngadto sa Liloan Police Station ang laing batan-on nga giingong apil sa pagpangrakrak sa grupo sa mga batan-on nga nagtambay sa convenience store sa Barangay Yati, Lungsod sa Liloan niadtong Mayo 9,2024.
Si alyas Ugoy, 16 anyos, nagpuyo sa Sitio Tagaytay, Barangay Calero, Liloan gikuyogan sa iyahang mga ginikanan sa pagtahan kagahapon Mayo 10, 2024 sa alas-3 sa hapon.
Matud ni Police Major Eric Gingoyon, hepe sa Liloan Municipal Police Station nga si alyas Ugoy usa sa mga ga-motor nga nangrakrak sa mga biktima.
Apan gihimamak kini ni alyas Ugoy nga duna siya'y kalambigitan sa nahitabo. Apan matud pa ni Gingoyon, si alyas Ugoy maoy gitudlo sa laing mga suspek nga silang alyas Nilo ug alyas Makmak nga kini usa sa mga namusil.
Padayon pa ang interogasyon sa kapulisan sanglit aron masuta kung duna pa sila'y laing kauban sa paghimo sa maong krimen.
Unang nadakpan ang upat ka mga suspek nga silang alyas Nilo, 18 anyos, residente sa Barangay Looc; ang magsuong kaluha nga sila si alyas B1 ug B2, pulos 34 anyos ug residente sa Barangay Jagobiao, dakbayan sa Mandaue ug si alyas Mak-mak, 21 anyos, nagpuyo sa Barangay Calero, Lungsod sa Liloan.
Personal grudge ug gang war ang motibong gitan-aw sa kapulisan sa maong pagpamusil.
Matud pa nanimawos ang mga suspek nga mga miyembro sa Bloods ngadto sa mga biktima nga sakop sab sa Crips gang kay matud pa ang uyab sa nakalas nga 16-anyos nga dalagita maoy nidunggab sa ilang kauban atol sa rambol diha gihapon duol sa maong convenience store pipila ka adlaw na ang nakalabay.
Sayo anang gabhiuna sa pagkahitabo, nag-abot na ang duha ka grupo kay pista sa Mandaue City ug nagkarambola sab sila apan nabadlong sa mga polis maong nanglakaw.
Namalhin sa Lungsod sa Liloan ang mga Crips apan gisundan sila sa mga suspek ug didto gipamusil.
Curfew
Tungod sa nahitabong pagpamusil nga naglambigit og mga minor de edad sa maong lungsod nga mikalas og kinabuhi ug miangol og duha nipatuman og curfew ang lungsod ubos sa kamandoan ni Mayor Aljew Frasco.
“…we have deemed it necessary to implement a Municipal-Wide curfew, effective immediately as of May 10, 2024. The curfew hours will be from 10 pm to 4 am,” matud ni Frasco sa iyang gipagawas nga opsiyal nga pamahayag kalabot sa maong hitabo.
Pangusgan na sab ang pagpatrolya sa kapulisan sa Liloan ug gipasidan-an ang mga tindahan nga dili mobaligya og sigarilyo ug ilimnong makahubog sa mga menor de edad.
“Furthermore, I urge all proprietors to refrain from selling cigarettes or alcoholic beverages to minors, as stringent enforcement measures will be enacted against violators,” dugang ni Frasco.
Apil pud sa giawhag ni Frasco ang mga ginikanan nga bantayan ang mga anak hilabina ang mga 17 anyos paubos. (BANAT NEWS)