Tulo ka babaye nga nalambigit sa ilegal nga swertres sikop

CEBU, Philippines — Tulo ka babaye ang nadakpan sa kapolisan sa Cordova Police Station atol sa ilang operasyon batok ilegal nga sugal diha sa managlahi nga barangay sa Lungsod sa Cordova niadtong Martes.

Unang operasyon sa kapolisan diha sa Sitio Calan, Barangay Poblacion, Lungsod sa Cordova diin nasikop si Magdalena Bautista Ontong, 34-anyos, residente sa Purok Inco Ciano sa maong barangay.

Ang kapolisan sa lungsod nakadawat og report kalabot sa transaksiyon sa ilegal nga swertres diha sa lugar hinungdan nga nipahigayon sila og operasyon.

Giingong naaktohan sa mga polis si Ontong kinsa usa ka usher nga adunay transaksiyon sa nahisgutang ilegal nga sugal.

Nasakmit sa kapolisan ang bet stubs nga adunay nagkalain-laing digit number combination ug uban pa.

Nasayran nga ang suspetsado nadakpan na kaniadto sa susamang kalapasan.

Samtang sa samang adlaw, nadakpan usab sila si Narisa Licale Lucero, 32-anyos, taga Purok Apahan, Camolinas ug Juvelyn Cabanes Pogoy, 42, taga Purok Sambag, Barangay Day-as gumikan gihapon sa ilegal nga swertres.

Ang duha nasikop diha sa Purok 1, Barangay Dapitan sa nahisgutang lungsod.

Giingong si Lucero usher kini sa ilegal nga sugal ug si Pogoy ang namusta. (BANAT NEWS)