CEBU, Philippines — Sulod lang sa duha ka adlaw nga Simultaneous Anti-Criminality Law Enforcement Operation(SACLEO) sa Police Regional Office(PRO)-7 nakadakop sila og 504 ka suspetsado sa nagkalain-laing sa krimen.
Ang operasyon gasugod sa Abril 29 hangtud sa 30, 2024 diin 2,440.67 ka gramong ilegal nga drugas nga nagkantidad ngadto sa P16.4 milyones ang nasakmit sa kapolisan.
Nasikop usab sa mga operatiba ang 147 ka drugs personalities kinsa mag-atubang og kasong kalapasan sa Akta Republika 9165 kun “Comprehensive Dangerous Drugs Act of 2002”.
Sa illegal gambling operations niabot sa 242 ka sugarol ang nadakpan sa kapolisan ug nikabat ngadto sa P22,553 nga pusta ang nakompiska.
Na-recover usab sa kapolisan ang 110 ka unregistered firearms sa ilang operasyon batok sa loose firearms ug 14 ka suspetsado ang nadakpan.
Samtang ang korte niisyu og warrants nga gi-serve ngadto sa 11 ka most wanted persons ug 91 ka other wanted persons.
Si Police Brigadier General Anthony Aberin, direktor sa PRO-7 nidayeg sa iyahang mga sakop sa maong kalamposan ug mimando nga magpabiln ang walay paglugak nga paggukod sa mga kriminal sa rehiyon-7.
"Non-stop, series and simultaneous impactful anti-drug operations will be continuing as long as illegal drug personalities will not change their ways. Our commitment to deliver a safe and secure Central Visayas will be unwavering, uncompromising and relentless", matud ni Aberin.
Samtang si Police Lieutenant Colonel Gerard Ace Pelare, tigpamaba sa PRO-7 nagkanayon nga nagpabilin ang ilang ka agresibo sa pagpanakop sa mga suspetado nga nalambigit sa tanang matang nga krimen.
"Dako kaayo og tabang ang miyembro sa komunidad nga naghatag og mga information para among magamit sa pag-conduct og mga operations...Atong warning sa nagmagahi nga nagsige gihapon og himo og ilegal nga ang inyong oras inihap nalang tungod sa kadako ug kadaghan sa operations maabtan ra gyud mo", ni Pelare pa.
Ang mga suspetsado anaa karon sa custodial facility ug gipasakaan na og tukmang kaso. (BANAT NEWS)