Pope Francis: pabiling magmatinud-anon

CEBU, Philippines — Bisan sa mga balita nga nagmasakiton si Santo Papa Francis, nangulo kini sa pagpahigayon sa kapin duha ka oras nga Easter Vigil Mass sa Saint Peter's Basilica. Mao kini ang usa sa labing taas nga serbisyo sa liturhiya sa Simbahang Romano Katoliko.

Kini bisan pa man og dunay mga kabalaka sa kahimtang sa panglawas sa 87-anyos ug masakiton nga Santo Papa, giagwanta ug nilahutay kini sa maong pagserbisyo atubangan gibanabanang kapin 6 mil ka mga magtutuo.

Sa iyang homiliya, si Pope Francis miawhag sa tanan nga kinahanglang magpabilin matinud-anon ug lig-on ang pagsalig ngadto kang Kristo bisan sa kagul-anan, kahadlok ug uban pang mga bug-at nga pagsuway nga moabot sa kinabuhi.

Mabatyagan sa iyang tingog nga usahay pagaw ug nahangak sa pagginhawa, milampos kini sa pagbasa sa iyang basahon apil na ang sobra usa ka pahina nga homiliya inubanan sa pagpahiyom ug miwarawara sa iyang kamot ngadto sa mga mitambong sa misa sa dihang mibiya na siya luwan sa wheelchair.

Dunay mga higayon nga gipabasa ni Pope Francis sa iyang mga sinaligan ang basahon sa iyang mga kalihokan.

Niadtong adlaw nga Biyernes, gikanselar sa Santo Papa ang iyang pagduyog sa Via Crucis (Way of the Cross) procession sa Rome Coliseum  nga gihulagway sa Vatican nga gituyo aron pagpreserbar sa iyang kusog ug panglawas alang sa umaabot nga mga relihiyosong kalihokan sa Semana Santa.

Ang pagtambong sa Santo Papa sa Easter Vigil Mass nakasurpresa sa tanan tungod ka pipila ka semana na nga wala kini mopakita sa publiko tungod matud pa sa giingong kini dunay hilanat, bronchitis ug flu.

Tungod sab sa iyang panglawas, gidid-an ang Santo Papa nga maglihuk-lihok ilabi pa nga deperensiyado na ang tuhod niini ug kanunay na kining magsungkod o mag wheelchair.

Hinuon nabantayan nga niadtong Huwebes Santo, baskog ang panglawas ni Pope Francis sa dihang iyang gihimo ang seremonya sa paghugas sa tiil nga gihimo sa usa sa mga prisohan sa kababayen-an, sama sa pagpahinumdom sa tanan sa gihimo ni Hesus nga pagpakita og pagpaubos ngadto sa iyang mga apostoles  sa Last Supper ug sa Good Friday service sa St Peter's Basilica.

Ang Semana Santa gilangkuban og daghang mga solemning seremonya nga matapos sa Domingo sa Kabanhawan nga maoy pinaka importanteng adlaw sa kalendaryo sa Kristiyano diin gisaulog sa tanang magtutuo ang pagkabanha ni Hesukristo.

Gitapos sa Santo Papa ang Easter Sunday pinaagi sa gitawag nga "Urbi et Orbi"(sa siyudad ngadto sa kalibotan) nga bendisyon ug mensahe gikan sa central balcony sa St. Peter's Basilica.— IBM (BANAT NEWS)