CEBU, Philippines — Gikonsiderar na karon ang hinay-hinay nga pagpatuman sa Fair Market Value (FMV) diin ibase ang revised Real Property Tax (RPT) rates nunot sa panawagan sa property owners sa palibot sa Dakbayan sa Sugbo.
Kini matud ni Konsehal Noel Wenceslao, chairman sa committee of budget and finance sa Cebu City council kinsa mao usab ang nagsulat sa revisions sa Real Property Tax Code sa siyudad.
Ang Cebu City gikonsiderar nga usa sa pinaka-highly-urbanized sa mga siyudad apan matud ni Wenceslao nga ang Dakbayan sa Sugbo maoy usa sa pinakaubos og rate sa RPT tungod kay dugay na nga wala ma-revise.
Ang public hearing gihimo niadtong Nobiyembre 2023 ug atol sa maong hearing, kadaghanan sa mga sakop sa Cebu Chamber of Commerce nihangyo nga tugotan sila nga adunay staggered nga pagpatuman sa revised RPT.
Subay niini, si Wenceslao nagkanayon nga kinahanglang balanse sila sa pagpatuman sa giusab nga RPT diin nagkasabot sila sa kahimtang sa mga negosyo ug aduna kini dakong kontribusyon sa paglambo sa ekonomiya sa dakbayan.
Gibutyag ni Wenceslao nga aduna na siya’y final draft sa ordinansa nga ipresentar pa ug hisgotan diha sa konseho.
“In my ordinance, nakasabot kos mga businesses nga gikinahanglan gyud nato nga i staggered ang implementation”, ni Wenceslao pa. Hinuon dili pa niya ibutyag ang mga bayranan tungod kay kinahanglan kining aprobahan sa mayoriya sa konseho.
Bisan pa sa mga konsiderasyon, si Wenceslao nagkanayon nga kinahanglan usab nila nga ipahibalo sa mga tag-iya sa property nga kinahanglan nga usbawan ang rate sa RPT. (BANAT NEWS)