CEBU, Philippines — Palig-onon sa kapolisan sa Mandaue City Police Office (MCPO) ang ilang puwersa alang sa paghingusog sa pagbantay batok sa mga tawo nga makalapas sa environmental policy nga ipatuman sa lokal nga kagamhanan sa maong dakbayan.
Ang kapolisan moabag sa buhatan sa Mandaue City Environment and Natural Resources Office (MCENRO) sa pagbantay sa mga malapason sa balaud. Gisabotan sa MCENRO ug MCPO nga hugot nga ipatuman unya sa Marso 6, 2024 ang pagbantay sa mga magpataka og pangihi, pagpataka og labay sa ilang basura ug uban pa nga naglambigit sa kalapasan sa environmental policy sa lokal nga kagamhanan.
Kini panguluhan ni Police Colonel Maribel Getigan ug MCENRO chief Architec Araceli Barlam.
Si Mandaue City Mayor Jonas Cortes sa kanunay nagpahinumdom sa katawhan sa responsable nga paghipos ug paglabay sa mga basura aron kalikayan nga mabara ang mga drainage o kanal nga maoy hinungdan sa pagbaha.
Sa laing bahin nadakpan sa kapolisan sa Lapu-Lapu City Police Office (LCPO) sa usa ka semana nilang operasyon ang 4,129 ka mga tawo nga nakalapas sa gipatuman nga mga lokal nga ordinansa sa siyudad sa Lapu-Lapu. Ang mga dinakpan giisyuhan og citation ticket nga maoy basehan sa ilang pagbayad og multa.
Si Police Colonel Christian Torres, tigpamaba sa LCPO miingon nga ang usa ka semana nilang operasyon ilang gisugdan niadtong Pebrero 4 hangtud sa Pebrero 10,2024. Lakip sa mga kalapasan mao ang pagpanigarilyo sa publikong lugar, pag-inom og ilimnong makahubog, pagpataka og labay sa mga basura, pagsuroysuroy sa gawas sa panimalay nga hubo ang ibabaw'ng bahin sa lawas ug uban pa. (BANAT NEWS)