Mactan Bridge, dalan padulong merkado sa Lapu-Lapu sirad-an

CEBU, Philippines — Temporaryong sirad-an ang Mandaue- Mactan Bridge ug ang mga dalan nga nagpaingon sa merkado publiko sa Siyudad sa Lapu-Lapu karong adlawa Enero 19, 2024 sugod sa alas-10 sa gabii hangtod sa alas-6 sa buntag sa Enero 20, 2024.

Kini tungod sa ipahigayong Traslacion sa Imahen ni Senyor Sto. Niño kauban ang imahen ni Senyor San Jose sa Mandaue City ngadto sa  National Shrine sa Birhen sa Regla sa Barangay Poblacion sa maong dakbayan aron matibuok ang Sagrada Pamilya.

Dugang mga dalan ang pagasirad-an nga gikan sa merkado publiko paingon sa Barangay Looc sa maong siyudad nga magsugod gihapon sa alas 10 sa gabii hangtod sa alas 6 sa buntag sa Sabado.

Hinuon si Police Lieutenant Colonel Christian Torres, tigpamaba sa Lapu-Lapu City Police Office (LCPO) miingon nga mahibalik nga naandan nga pag-agi sa mga sakyanan sa higayon nga mahuman ang fluvial procession nga pagahimoon.

Matud pa ni Torres nga atol sa fluvial procession itugot ang pag-estambay sa mga tawo nga nagtinguha sa pagtan-aw sa paglabay sa Mactan Channel.

Si Torres miingon atol sa fluvial procession walay tugotan nga sakyanan o motorsiklo nga mohunong sa tungatunga nga bahin sa maong taytayan. (BANAT NEWS)