CT-TODA, MITCOM heightened alert alang sa Fiesta Señor
CEBU, Philippines — Ubos na sa heightened alert ang mga sakop sa City of Talisay-Traffic Operation Development and Authority (CT-TODA) ug Minglanilla Traffic Commission (MITCOM) gumikan sa pagsugod sa mga kalihokan sa kapistahan ni Señor Santo Niño.
Si Glenn Antigua, pangulo sa MITCOM nagkanayon nga wala na sila’y gitugotan nga maka-leave sa mga iyang sakop.
Kini aron full force sila sa pag-assist sa dagan sa trapiko ilabi na sa tingpauli sa mga tawo gikan sa Siyudad sa Sugbo.
Si Jonathan Tumulak, pangulo sa CT-TODA nagkanayon nga gipanglantawan nang daan nga maapektohan usab sila sa Talisay sa dagan sa trapiko tungod kay silingan man sila sa Siyudad sa Sugbo.
Isip pagpangandam, nagtagbo sila nga mga tagdumala sa trapiko gikan sa Siyudad sa Sugbo hangtud sa mga dakbayan sa Mandaue ug Lapu-Lapu.
Ilang gihisgotan ang mga lakang aron adunay sila’y mga koordinasyon sa pagpatuman sa dagan sa trapiko.
Gipahibawo usab ni Tumulak nga karong Sabado sa alas 10:00 sa gabii siradohan ang utlanan sa Dakbayan sa Talisay sa Cebu South Coastal Road alang sa pagahimuon nga fun run diin ang Natalio Bacalso Avenue lang una ang maagi-an sa maong adlaw. (BANAT NEWS)
- Latest
