CEBU, Philippines — Giawhag sa Kapitolyo ang Cebu City Hall nga tugotan ang mga tindero nga makabaligya sa sulod sa grand stand sa Cebu City Sports Center atol sa Sinulog sa Kabataan sa Lalawigan.
Ang maong hangyo nahimo aron di na kinahanglan pa mogawas sa mga mosaksi sa pasundayag aron mopalit og mga pagkaon.
Si Gobernador Gwendolyn Garcia miingon nga higayon usab kini alang sa mga gagmay nga nagnegosyo nga mahalinan atol sa maong kalihokan.
“I was hoping that we could offer this bisan na lang makatabang-tabang sa atong mga hotels or even food kay affordable man kaayo na inyung mga baligya,” matof ni Garcia atol sa iyang tigom uban sa mga opisyal sa Hotel, Resort, and Restaurant Association of Cebu Inc. (HRRACI), ug mga representante sa pipila ka fast food chains.
Sumala sa Capitol Information Office nga niawhag si Garcia sa mga fast-food chains nga maoy supplier sa pagkaon sa mga sobra 1,500 ka mga personnel nga motrabaho atol sa Sinulog sa Kabataan sa Lalawigan sa Enero 14.
Sa maong gidaghanon 1,100 niini ang uniformed personnel sama sa mga police, militar, coast guard ug uban pa nga magbantay sa dalan nga agian sa street dancing gikan sa Cebu Capitol padulong sa CCSC.
Ang Kapitolyo mo-deploy sab og 400 ka mga personnel nga magsilbi nga support staff atol sa maong kalihokan.
Subsob na ang pagpangandam sa contingent sa Siyudad sa Lapu-Lapu alang sa ilang pagsalmot sa Sinulog sa Kabataan sa Lalawigan karong Enero 14, 2024.
Si Mayor Junard "Ahong" Chan miingon nga gipaspasan ang gihimo nga mga pagbansaybansay sa ilang contingent aron mo-compete Cebu City Sports Center sa Abellana sa Siyudad sa Sugbo.
Ang contingent sa siyudad gigahinan og P3.5 milyones para sa ilang costumes, props, ug uban pang gikinahanglan para makasalmot sa kompetisyon.
Si Chan miingon nga ang P1.5 milyones niini gikan sa ilang kaugalingong panudlanan ug subsidiya nga P2 milyones gikan sa lalawigan. IBM, BANAT NEWS