CEBU, Philippines — Misaka ang presyo sa karneng baboy, baka, manok apil ang isda sa merkado sa Carbon sa Dakbayan sa Sugbo, kay matud nihit ang supply niini.
20 ngadto sa 30 pesos ang umento sa karneng baboy depende sa parte sa lawas niini.
Ang pork belly gikan sa P300 ang kilo karon niabot ngadto sa P330, ang tenderloin gikan sa 280 nahimo na kini karon nga P310 ang kilo.
Sumala pa sa mga meat vendor nga ang kanihit sa supply sa karne karon ang hinungdan sa pagtaas sa presyo ug taas na usab ang presyo niini sa ilang supplier.
Adunay laing kapilian aron makabarato ang imported meat nga moabot lang sa P185 ang kilo sa maskara nga baboy nga adunay unod samtang tag P280 ang kilo sa pork belly.
Ang karneng baka nimahal usab og tag P50 ang matag kilo diin ang pure nga unod tag P400ang matag kilo, ang tinderloin P700 ang kilo samtang ang bukog tag P180ang kilo.
Ang karneng manok miumento usab tag P10 ang kilo diin niabot na ngadto sa 185 ang kilo sa whole chicken.
Nimahal usab og P30 ngadto P50 ang kada kilo sa isda sama sa katambak nga tag P230 ang kilo gikan sa P200, ang molmol gikan sa P250 karon P300 na. (BANAT NEWS)