Polis naunay sa iyang armas, patay

CEBU, Philippines — Migawas sa imbestigasyon sa La Libertad Municipal Police Station nga accidental discharge ang nahitabo nga niresulta sa kamatayon ni Police Staff Sergeant John Kelly Catedral sa Sitio Looc, Barangay Martilo, Lungsod sa La Libertad, Probinsiya sa Negros Oriental kagahapon sa buntag.

Giklaro kini ni Police Staff Sergeant Gerome Gargoles, imbestigador sa La Libertad Municipal Police Station bahin sa kamatayon ni Police Staff Sergeant Catedral.

“Ako lang i-clarify ang unang nanggawas nga news nga gipusil. Actually gi-rule out na nga gipusil siya, wala siya gipusil, accidental discharge sa service firearm niya,” matud ni Gargoles.

Matud pa padung mo-duty sa La Libertad Municipal Police Station si Catedral sakay sa iyang motor gikan sa balay niini sa Poblacion, Guilhulngan City.

Samtang naglingkod sa iyang motor, gikatahong gitarong ni Catedral ang iyang gisambilay nga ‘long firearm’ apan nibuto kini ug aksidenteng naigo iyang apapangig ug milapos ang bala diha sa iyang tampihak.

“Naa raman siya’y gikuha sa ilang balay, pagbalik niya ganina sa station mao nato naaksidente lagi intawon,” sigon ni Gargoles.

Nakuha diha sa nahitaboan ang usa ka basiyo sa bala nga gituohang gikan sa iyang service long firearm.