Kapolisan sa Talisay gibansay; PRO-7 nipadala og ayuda sa Northern Samar

CEBU, Philippines — Gipaubos sa pagbansay ang grupo sa kapolisan sa mga pamaagi sa pagluwas sa kinabuhi sa tawo nga naigo sa kalamidad o disgrasya.

Kapin sa 20 ka polis sa Dakbayan sa Talisay ang nisalmot sa training and seminar sa basic preparedness exercise.

Lakip sa maong pagbansay-bansay ang basic knot tying, emergency carry techniques o ang pag-alsa sa tawo nga nakuyapan atol sa dili maayo nga panghitabo.

Si Police Lieutenant Colonel Wayne Magbanua, hepe sa kapolisan sa siyudad nagkanayon nga dili lang sa pagpatuman sa kahapsay ug kalinaw ang kapolisan apan motabang usab kini sa bisan unsa nga mga panghitabo.

Matud ni Magbanua nga angayan lang nga aduna sila’y kaalam sa pagluwas tungod kay sila man ang dali nga matawag sa bisan unsa nga alarma.

Ang pagbansay dili lang sa yuta lakip na niini ang pag-rescue diha sa kadagatan.

Nagkat-on sa pamaagi sa pagbugsay ang kapolisan ug mga pamaagi sa pagluwas sa tawo nga malimos.

Sulod sa pipila ka adlaw nga pagbansay masaligon si Magbanua nga daghan sila og makat-onan ug ang iyang mga sakop sa matang sa pagluwas sa kinabuhi sa tawo sa bisan unsa nga klase nga panghitabo.

Sa laing bahin, nagpadala ang Police Regional Office-7 og relief goods nga gilangkuban sa mga sinakong bugas, noodles, mainom nga tubig, sinina ug ubang essential items niadtong Disyembre 7, 2023 ngadto sa Northern Samar nga naigo sa grabeng baha.

Ang mga personnel sa Regional Community Affairs Development Division sa PRO-7 sakay sa M/V Filipinas Ozamis sa Cokaliong Shipping ug nangulo sa pag-transport sa mga relief goods paingon ngadto sa Calbayog City, Samar.

Matud ni Police Brigadier General Anthony Aberin, direktor sa PRO-7 nga ang maong relief efforts ubos kini sa PNP's Adopt a Region Program nga magpadala og tabang sa pamilya nga grabeng naapektohan sa baha diin gitawag kini og "Handog ng PRO-7 Para sa Region-8”.

"We send our message to the people of Northern Samar that help is on the way for affected families and communities. PRO-7 is linking arms with Region-8 by donating goods and other essential items to help them rebuild and rise from this challenging situation", padayag ni Aberin.

Ang mga goods nga gi-transport ug gi-turnover naglangkub sa 259 food packs, 480 bottles drinking water, 350 pieces hygiene kits, box sa kandila, canned goods, 13 boxes sa instant noodles, upat ka sako  assorted clothing, ug ubang essential items. — Decemay P. Padilla, BDB (BANATNEWS)