CEBU, Philippines — Ipatuman na unya ang truck lane diha sa Cebu South Coastal Road (CSCR) sa Dakbayan sa Talisay.
Kini human si Konsehal Alito Bacaltos niduso og resolusyon aron sa paghangyo sa City of Talisay-Traffic Operation Development and Authority (CT-TODA) nga ipatuman ang truck lane.
Naobserbahan ni Bacaltos nga kasagaran sa mga nagmaneho og truck walay mga disiplina.
Ang tumong sa resolusyon kadtong mga truck nga adunay gibug-aton nga 4,500 kilograms pataas.
Si Jonathan Tumulak, pangulo sa CT-TODA nagkanayon nga ilang sugdan ang eksperimento sunod buwan gikan sa alas 10:00 sa gabii hangtud sa alas 4:00 sa kadlawon.
Diha nila ipahimutang sa middle lane ang mga truck aron libre sa ubang sakyanan ang inner ug outer lane.
Dugang ni Tumulak nga kong epektibo kini posible nga himoan og ordinansa. (BANAT NEWS)