Pamilya sa motorista nga namatay sa aksidente mosang-at og kaso

CEBU, Philippines —  Mopasaka og kaso ang pamilya sa motorista nga nadasmagan patay niadtong Biyernes diha sa Barangay Macaas, Lungsod sa Catmon.

Ang biktima nga si Mark Nombrado Tenebroso, 27 anyos nagsakay sa iyang motorsiklo nga padulong na mopauli gikan sa Catmon paingon sa siyudad sa Mandaue.

Suma pa ni Police Captain Arturo Marfil, hepe sa Catmon Police Station nga nag-una sa iyang higala si Tenebroso gikan nga nanagkot sa menteryo dihang nahitabo ang aksidente.

Ang drayber sa wing van nga gikadasmag niini naila nga si Arvin Limpag, 40 anyos nga molopyo sa Barangay Catarman sa Lungsod sa Liloan kinsa gitanggong karon sa detention cell sa Catmon Police Station.

Gitug-an ni Marfil nga base sa ilang pasiunang imbestigasyon ilang nasayran nga sa paghidangat sa nahisgutang lugar giingong nisimang sa pikas lane sa dalan ang biktima.

Kini maoy hinungdan nga gikadasmag niini ang gikasugat nga wing van nga padulong sa amihanang lungsod aron sa paghatod og supply sa usa ka convenience store.

Gumikan sa kusog nga impact sa panagdasmag daw nawad-an sa iyang pagpanimbang ang motorista hinungdan nga nalamba kini sa karsada nga nakaingon sa grabeng kadaut sa iyang kalawasan.

Dali untang gidala ang biktima ngadto sa Sogod District Hospital apan gideklarar kini sa mga doktor nga dead on arrival. (BANAT NEWS)